Алқа отырысына Президент Әкімшілігі өкілдері, Президент жанындағы Мемлекеттік басқару академиясы, Агенттік жанындағы Қоғамдық кеңес, Әдеп жөніндегі комиссия, Сервистік мемлекеттік аппаратты қалыптастыру және оның қызметін бюрократиядан арылту жөніндегі консультативтік-сараптамалық топ мүшелері қатысты.
«Былтыр Президенттің тапсырмасына сәйкес, Мемлекеттік басқару академиясының құрылымында адами ресурстарды басқарудың заманауи құралдарын қолданатын арнайы HR институты құрылды. Тікелей тағайындау мүмкіндіктеріне сәйкес жоғары оқу орнын бітірген 100-ден астам түлек конкурстан тыс аудандық және ауылдық деңгейдегі төменгі лауазымдарға тағайындалды, ал 300-ге жуық жеке сектордың тәжірибелі маманы мемлекеттік қызметке қабылданды. Жас мамандарды мемлекеттік басқару жүйесіне тарту жұмыстары әлі жалғасады. Биыл алғаш рет Өңірлік жастар кадр резервтеріне іріктеу жүргізіледі. Іріктеу 7 салалық бағыт бойынша өтеді», – деді Агенттік төрағасы.
Алқа отырысында мемлекеттік аппаратты бюрократиядан арылту бойынша жұмыстың алдын ала қорытындылары айтылды. Мемлекеттік органдармен бірлескен жұмыс нәтижесінде 550-ден астам бюрократиялық кейс әзірленді. Ұсыныстардың 152-сін іске асыру үшін заңнамалық деңгейде шешімдер қабылдауды қажет етеді. Жоғарыда аталғандардан бөлек, былтыр Агенттік көмегімен 360 қызмет алушының құқығы қалпына келтірілді, Үкіметке мемлекеттік аппараттың қызметін бюрократиядан арылту бойынша 550 ұсыныс енгізілді, іріктеудің жаңа жүйесі бойынша мемлекеттік қызметке үміткерлер саны 2,7 есе өскен, 234 мемлекеттік қызметшіге үстеме жұмыс істеуге байланысты қосымша тынығу сағаттары берілді. Дархан Жазықбай мемлекеттік қызмет – бұл мемлекеттік қызметшілерден елдік мүддені, заңдар мен адамгершілік ұстанымдарды жеке пайдадан биік қоюды талап ететін қоғамдық сенім екенін ескертіп, соған орай мемлекеттік қызметшілердің әдеп қағидаттарына жоғары талаптар қойылатынын айтты. Сондай-ақ Агенттік басшысы мемлекеттік қызметшілердің құмар ойын мекемелеріне бару фактілеріне орай қоғам тарапынан сыни пікірлер мен наразылықтар туындайтындықтан, былтыр Әдеп кодексіне мемлекеттік қызметшілерді құмар ойын мекемелеріне барудан бас тартуға ынталандыру бойынша түзетулер енгізілгенін атап өтті.
2023 жылы сауда және интеграция, қаржы, халықаралық қатынастар, ауыл шаруашылығы, экология және табиғи ресурстар сынды 5 салалық бағыт бойынша жүргізілген. Мониторинг қорытындысы бойынша, адам қажеттілігіне және сервистік мемлекеттік аппаратты қалыптастыруға бағдарланған, сондай-ақ бюрократиялық кедергілерді азайтуға бағытталған ұсыныстар әзірленді.
Сонымен қатар алқа отырысында Агенттіктің алдағы жылға арналған жұмыс жоспарлары талқыланды. Олардың қатарында мемлекеттік қызметті кәсібилендіру бойынша жұмысты жалғастыру, мемлекеттік аппаратты бюрократиядан арылту бойынша заң шығарушылық қызметті күшейту, жастарды мемлекеттік қызметке тарту және одан әрі цифрландыру процестерін жетілдіру бар.
Сымбат БАУЫРЖАНҚЫЗЫ