Индустрия министрлігінде Шамалған стансасындағы жол өткелі биыл салынып, эстакада түрінде салынатынын айтты. Жоба 2021 жылы пайдалануға беріледі.
Автомобиль жолдары комитеті ғылыми-техникалық кеңес өткізді. Онда мамандар ұзындығы 340 метр болатын эстакада түріндегі өтпе жол құрылысының нұсқасын бекітті.
Көпір Шамалған және Екпінді елді мекендері арасында салынады. Жол айрығы теміржол өткелінен 250 метр қашықтықта орналасады. Бұл транзиттік көлік ағынын елді мекеннен тыс жерге көшіруге мүмкіндік береді.
Қазір алдағы құрылыс маусымы алдында дайындық жұмыстары жүргізілуде. Жоба 2021 жылдың тамыз айында пайдалануға беріледі.
Бұдан басқа, «Алматы-1 – Шамалған – Ұзынағаш станциясы»жолы бойынша Шамалған станциясында темір жол арқылы жаяу жүргіншілер өткелінің құрылысы басталды. Бұл мақсатқа жергілікті бюджеттен 330 млн теңге бөлінді.
Шамалған темір жол станциясындағы жол өтпесі ерекше реттеуді талап ететін құрылыс объектілеріне жатқызылған.
Шамалған стансасындағы апат 15 қыркүйекте орын алды. Сол кезде пойыз автобуспен соқтығысты. ЖКО салдарынан үш адам зардап шекті, олардың біреуі қаза тапты.
