Әнші Сәкен Майғазиев осыдан 20 жыл бұрын болған оқиғаны айтып берді, – деп хабарлайды Aikyn.kz.
Ол жас кезінде 2-3 жастағы баласы бар тұрғынның үйіне қонақ болып, кішкентай ұлына бата берген кезін еске алды.
“Екі күн бұрын орталық клиникалық аурухана дәлізінде жүзінен нұр төгілген келіншек пен оның қасындағы 16 жас шамасындағы қызымен жылы ұшырап амандастық. Шырамытқаныммен, танымадым. Сөйтсем, 19 жыл бұрын, яғни 2005 жылы жер жәннаты Жетісуда бұл кісілердің қара шаңырағында қонақта болыппыз. Сол үйдің көз қуанышы, еркесі осы суреттегі Сезім есімді баланы (шамамен 2-3 жаста болса керек) ата-анасы менің қолыма ұсынып, аузына түкіруімді өтініпті. Алланың қалап, аузыма салып тұрғаны ғой, кішкентай Сезім ұлымызға ақ жол, жарқын болашақ тілеп: "Сен әнші болмай-ақ қой, сен асқан білім мен ғылымның иесі бол” деп бата беріппін. 30 жасымда не деген бата десеңші!", – деп жазды әнші.
Оның айтуынша, сол бала бүгінде Гарвардқа оқуға түскен.
«Талдықорған қаласындағы Назарбаев зияткерлік мектебін тәмамдаған Сезім Ертаңатов әлем бойынша 55 000 үміткердің ішінен топ жарып, 2021 жылы Гарвард университетінің оқу грантына ие болыпты. "Сезім Гарвард" деп "гуглдата" қойып едім, Сезім Ертаңатов туралы ақпарат атып шықты. Айтқым келгені, бір-бірімізге жақсылық тілеп, жақсы сөйлеп, жақсы ойлап, қолдап, демеп жүрейікші. Жақсы сөз – жарым ырыс", – деді әнші.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.