Роза Бағланова атындағы «Қазақконцерт» мемлекеттік академиялық концерттік ұйымы Мәдениет және ақпарат министрлігінің қолдауымен 64-ші концерттік маусымының ашылу аясында еліміздің және алыс-жақын шет мемлекеттерден келген ең үздік вокалистердің басын қосқан Роза Бағланова атындағы халықаралық вокалдық конкурсын ұйымдастыруда.
Қазақстанның және КСРО-ның Халық әртісі, Халық ҚаҺарманы, аты аңызға айналған әнші Роза Бағланованың шығармашылығын кеңінен насихаттауға, ұлттық және әлемдік мәдениеттің үздік дәстүрлері мен жетістіктерін жаңғыртуға, сондай-ақ жас вокалистерді анықтап, қолдауға бағытталған.
Сахна сандуғашы Роза Бағланованың құрметіне арналған конкурсының қазылар алқасы қатарында Қазақстан Республикасының және Қырғыз Республикасының Халық әртісі Алтынбек Қоразбаев, Қырғыз Республикасының Халық әртісі Роза Аманова, Өзбекстанның Халық әртісі Мансур Ташматов, Қазақстан Республикасының еңбек сіңірген әртістері Нұрлан Абдуллин, Жанна Орынбасарова, Жаннат Бактай және «Дарын» мемлекеттік жастар сыйлығының лауреаты Әлібек Әлмадиев секілді атаулы өнер майталмандары бар.
7-17 қыркүйек аралығында І кезеңде (онлайн формат) іріктеуден өткен үміткерлердің өнерлерін қазылар алқасы 27 қыркүйек күні офлайн форматта өтетін II кезеңде бағалайды.
Конкурс 28 қыркүйек күні жеңімпаздарды марапаттау рәсімі мен Қазақконцерт әртістерінің қатысуымен өтетін Гала-концертпен аяқталады.
Шараның басты мақсаты – конкурс жеңімпаздарының шығармашылық жетістіктерін дәріптеу, олардың өнерін кеңінен насихаттау және тыңдарман қауымға ұсыну. Гала-концертте финалистер мен Қазақконцерт жұлдыздары ән қоржындарындағы таңдаулы туындыларын орындап, әсерлі кеш сыйлайтыны сөзсіз.