Атырау қаласының «Нұрсая» шағынауданындағы №90 референдум учаскесінде алғашқы дауыс беруші өз таңдауын жасады.
71 жастағы Роза Нұрғалиева республикалық референдумда алғашқы болып дауыс беру үшін учаскеге асыға жеткен.
– Бұрын да мұндай саяси науқандарға келіп, өз таңдауымды жасап жүрмін. Бұл жолы да Қазақстан азаматы ретінде өзіндік үлесімді қостым. Мұндай саяси науқандарға үн қосу әрбір саналы азаматтың парызы, – дейді Роза апа.
Учаскелік комиссия мүшелері алғашқы дауыс берген еңбек ардагеріне арнайы сыйлығын тапсырып, құрмет көрсетті.
Комиссия төрағасы Гүлмаржан Бисембаеваның айтуынша, №90 референдум учаскесінде 2 297 дауыс беруші бар. Ал Атырау қаласы бойынша барлығы 1 аумақтық, 134 учаскелік референдум комиссиясы бар. Оның ішінде 7 учаскелік комиссия жаңадан құрылған.
Еске сала кетелік, Атырау облысында 411 880 дауыс беруші бар.
Баян ЖАНҰЗАҚОВА, Атырау облысы
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз.