Жыл өткен сайын қалалық байқаудың жастар арасында танымалдығы артып келеді. Бұл жай ғана бәсекелестік емес, жұмысшы мамандықтарға деген көзқарасты өзгерту мен кәсіби шеберлікті дамыту үшін қолайлы орта құруға бағытталған ауқымды бастама.
«Байқау биыл үшінші жыл қатарынан ұйымдастырылып отыр. Бірақ колледж студенттері бұл жолы алғаш рет қатысуда. Былтырғы жылы қатысушылар 5 компетенция бойынша ғана сайысқа түссе, осы жылы 25 жұмысшы мамандықтар арасында бақ сынаспақ. Бүгінде жұмысшы мамандықтарды насихаттау мәселесі өте маңызды. Сондықтан нарықта сұранысқа ие мамандықтар таңдап алынды. Ең қызығы сайысқа қатысушылардың барлығы 22 жасқа дейінгі жұмыс істейтін және кәсіптік білім алып жүрген жастар», – деп атап өтті Астана қаласы Білім басқармасының техникалық және кәсіптік білім беру бөлімінің басшысы Ақмарал Хон.
Бұл сайыс бүгінде еңбек нарығында сұранысқа ие жұмысшы мамандықтарды насихаттаудағы табандылықтың көрінісі. Өйткені байқауға қатысушыларға ерекше назар аударылады. Олардың арасында қараша айында WorldSkills республикалық чемпионатына дайындалып жатқан студенттер бар. Бұл байқау қатысушыларға өздерінің күшті және әлсіз жақтарын анықтауға және сәтті өнер көрсету үшін қажетті дағдыларды жақсартуға мүмкіндік беретін тамаша дайындық болады.
«Біз жастарымыздың жоғары нәтижелерге қол жеткізгенін және кәсіби өсуге ұмтылғанын мақтан тұтамыз. Барлық қатысушыларға сәттілік, өз күштеріне сенімділік және жарқын табыс тілеймін!», – дейді Ақмарал Хон.
Бұл жоба аясында жыл соңына дейін 25 компетенция бойынша байқау өтеді. Сайыс соңында ең үздік деген үш жүлдегер марапатталмақ. «Астана жастары» Жастар ресурстық орталығы КММ бөлімінің басшысы Әлфараби Аймақтың айтуынша, қатысушыларды бағалау CS бағдарламасын пайдалана отырып жүргізіледі.
«Бұл сарапшылар мен қазылар алқасының мүшелері қойған бағалау процесінің адал бәсекелестігі мен ашықтығын қамтамасыз етпек. Байқау студенттер мен жұмыс істейтін жастар арасында тәжірибе алмасу үшін платформа құруға, сондай-ақ Астана қаласында жұмысшы мамандықтарға жоғары сұранысты көрсетуге бағытталған», – деп бөлісті Әлфараби Нұркенұлы.
Байқауға колледж студенттері мен жұмыс істейтін жастардың бірге бақ сынауы бірлескен білім беру ісін дамытуға мүмкіндік береді. Байқауға 300-ден астам адам қатысады.
«Мен өзімнің талантымды көрсетіп, тәжірибе алмасқым келеді. Байқауға дайындық барысында тенденцияларды зерттеу, материалдармен жұмыс істеу және түстер мен пішіндермен тәжірибе жасау жұмыстары қамтылған. Болашақта өз қабілетімді шыңдап, дамытуды, жаңа әдістерді үйренуді және жобалармен жұмыс істеуді жоспарлап отырмын. Мақсатым – халықаралық байқауларға қатысу және мүмкін өз студиямды ашу. Дағдыларды дамыту шығармашылыққа жаңа мүмкіндіктер берсе, ал жеңіс одан әрі жігерлендіре түседі деп ойлаймын», – дейді колледж студенті Балтабай Ержан.
2024 жылғы 9-31 қазан аралығында 10 колледжде 25 құзыреттілікте көшбасшылар анықталады. Олардың қатарында: құрылыс және жөндеу жұмыстары, аспаздық және кондитерлік өнімдер, Мейрамхана қызметі, IT-шешімдер, Шаштараз өнері, кәсіпкерлік, сондай-ақ педагогика және бала күтімі секілді салалар бар.
Іс-шара қорытындысы бойынша анықталған жеңімпаздар марапат қағазы мен сыйлықтарға ие болады. Бұл олардың одан әрі жетістіктері үшін қосымша ынталандыру болмақ.
Кәмила ЕРКІН