Әлеуметтік желіде Қазақстандағы халал индустриясы бойынша зерттеулер жүргізетін Агат Гидің жылқы етіне қатысты айтқан сөзі тарады, – деп хабарлайды Aikyn.kz сайты.
Ол жылқы етін мұсылмандардың ас ретінде тұтынғанына қарсы.
Жылқының етін харам дей алмаймыз. Бірақ жылқы еті – макрух болып саналады. Яғни, тұтынбаған жөн. Макрух түсінігінде халалға жақыны да, харамға жақыны да бар. Абу Ханифа мазхабы бойынша бұл макрух харамға жатады. Дубайда да солай саналады. Бірақ Қазақстанда Абу Юсуфтың ойын көбірек ұстанады. Ол бойынша жылқы еті халалға жақын макрух, – деді ол.
Зерттеушінің бұл сөзі желі қолданушылардың наразылығын тудырды.
ҚМДБ бұл видеоға қатысты жылқы еті мен сүті туралы үкімді ұсынды.
Жылқының етін жеуге болмайды дейтін тарап оны тахрими (харамға жақын) мәкрух деп біледі. Себебі, олар жылқы жорық және соғыс үшін қажетті құрал, негізгі күш ретінде қолданылады деп есептейді. Алла Тағала Құранда: "Сендер де шамаларың келгенше (дұшпандарға қарсы) әртүрлі күш әрі ат байлаумен әзірлік көріңдер", – деген. Сол сияқты жылқының жүк тасымалы және шаруашылық үшін қажетті екені ескеріледі. Тіпті, оны сәнге әрі мақтанышқа ұстауға болатындығы айтылады. Бұл аяттардан жылқыны жеуге болмайды деген мағына шықпайды, бәлкім оны жеумен қатар міну, жүк тасу секілді басқа да мақсаттарға, қажеттіліктерге қолдануға болатындығын ұғынамыз. Өйткені бір істің көбін пайдалану жағын айту, оның басқа тұстарын қолданбайтынын білдірмейді, – делінген үкімде.
Шариғат бойынша жылқының еті де, сүті (қымыз) де адал ас болып есептеледі.
Өзге үй жануарлары секілді жылқының сілекейі де шариғатта таза саналады. Ал сілекейдің үкімі жануардың етіне байланысты беріледі. Сондықтан жылқы етіне "тахрими мәкрух" деп үкім берілуі еттің нәжіс болғаны үшін емес, басқа мақсаттарда (міну, тасымалдау т.б.) пайдасы басым болғаны үшін, деп түсіндіріледі. Шариғат кітаптарында Әбу Ханифаның "жылқы етін жеу тахрими мәкрух" деп айтқандығының себебі де осыдан. Бұл – оның жылқы еті жайында ең әуелгі айтқан пәтуасы. Бірақ, өліміне үш күн қалғанда ол пікірін өзгерткен, яғни жылқы етін тәнзиһи (халалға жақын) мәкрух деген сөзге тоқтаған, делінеді. Имам Әбу Юсуф пен Имам Мұхаммед, сондай-ақ шафиғи мен ханбали мәзһабтарының өкілдері жылқы етін жеуге толық рұқсат етеді. Шариғат бойынша жылқының еті де, сүті (қымыз) де адал ас болып есептеледі, – деді Қазақстан мұсылмандары Діни басқармасында.