Соған сай әлемдегі бірқатар елдің өркендеуіне өзек болып отырған туризмді дамытуға Алматы облысында да айрықша көңіл бөлініп, қолдау жасалуда. Соның арқасы болар, биыл облысымыз туризмнің даму қарқыны бойынша бұрын болып көрмеген рекордтық көрсеткіштерге қол жеткізіпті. Осы салаға жауапты орындардың ақпаратына сай, биылғы қаңтар мен қазан айлары аралығында аймаққа 1,6 миллион турист келген, бұл былтырғы осы кезеңмен салыстырғанда 31%-ға артық. Бұл көрсеткіштер Қазақстанның, оның ішінде Алматы облысының саяхатшылар үшін танымал бағытқа айналып келе жатқанын айқын көрсетеді.
Аймаққа арнайы ат басын бұрған туристер арасында шетелден келген саяхатшылардың барынша артуы ерекше назар аудартады. eQonaq жүйесінің мәліметінше, 2024 жылдың 10 айында Қазақстанға сырт елдерден 111 352 шетелдік турист келген, бұл 2023 жылғы көрсеткіштен 73%-ға жоғары. Мұндай өсім алыс-жақын шетелдердегілердің біздің елдің табиғи байлығы мен мәдени мұрасына деген қызығушылығының арта түскенін байқатады.
Өңірдегі басты туристік нысандар ретінде облыс аумағында орналасқан ұлттық саябақтарды бөле-жара айтып кеткен жөн. Тұмса табиғат аясындағы асқар таулардың қойнауына орналасқан «Көлсай көлдері» ұлттық паркі, «Іле Алатауы» ұлттық паркі басқа елдерден келгендердің көзайымына айналған. Жұмбағы мен сыры мол Шарын шатқалының орны тіптен бөлек. Бұлардан басқа да туристерді тәнті ететін тамаша орындар жетіп артылады. Алматы облысындағы табиғи және тарихи орындар қазақстандық туристерді ғана емес, әлемнің түкпір-түкпірінен келетін саяхатшыларды тәнті етіп, өзіне тартуда.
Туризм саласындағы биылғы жетістіктер Алматы облысының Қазақстандағы басты туристік орталықтардың бірі ретіндегі мәртебесін нығайта түскені сөзсіз. Өңірдің қайталанбас табиғи ерекшеліктері мен артықшылықтары, бай тарихы, туризм саласындағы сапалы қызмет көрсету және ел мен жерді насихаттау саяхатшылардың жүрегін жаулауда.
Болат АБАҒАН,
Алматы облысы