Aikyn.kz қола дәуіріндегі адамдардың белгісіз металдан жасаған бұйымдарын зерттеу нәтижелерін bgr.com сайтында жарияланған материалға сүйеніп талдайды.
1963 жылы Аликанте (Испания) маңында табылған Вильена көмбесі соңғы қола дәуірінің ең қызықты олжаларының бірі болып саналады. 66 артефактен тұратын бұл ерекше жәдігерлер топтамасында алтыннан жасалған және Жерде кездеспейтін бөтен металдан жасалған іші қуыс жарты сфера мен білезік болған.
Осы екі зат археолог ғалымдарды қатты таңғалдырып, қызығушылығын туғызуда. Өйткені оларды жасауға қолданылған металл біздің планетамызда болмаған. Дегенмен соңғы зерттеулер бұл бұйымдардың метеориттік материалдан жасалғанын анықтады, бұл ежелгі қоғамдардың технологиялық және мәдени тапқырлығының ерекше дәлелі.
Бұл екі металл бұйымның сол кездегі заттарға ұқсамауының себебі – ол кезеңде Пиреней түбегінде темір балқыту әлі дамымаған еді. Метеориттік сынықтардан алынған темірдің қасиеттерін ежелгі шеберлер жақсы білген. Онда никельдің құрамы жоғары болғандықтан, ғарыштық металл жердегі темірден ерекше болған.
Жақында жүргізілген ғылыми талдаулар Вильена артефактілеріндегі екі бұйымның метеориттен алынған металдан жасалғанын, олардың ғарыштық шығу тегін көрсеткен. Бұл табылған бұйымдар кезінде перғауын Тутанхамонның метеорит темір қанжарына ұқсас болған және осы ғарыштан келген сирек материалдың құндылығын растайды.
Метеорит темірін пайдалану жоғары біліктілік пен шеберлікті қажет етті. Балқытылған темір сияқты емес, бұл бөтен металл нәзік және онымен жұмыс істеу қиын. Дегенмен Вильена қазынасының шеберлері осы аспаннан түскен металды күрделі әшекейлер мен тұрмыстық заттар жасауға қолдана алған. Осының өзі олардың металлургиялық мүмкіндіктерінің жетілгенінің дәлелі болады. Сондықтан да екі жәдігердің маңызды мәдени және символдық құндылығы бар.
Вильена қазынасы соңғы қола дәуіріндегі қоғамдардың даму деңгейін көрсетіп қана қоймай, олардың табиғи және аспан әлемімен терең байланысын көрсетеді. Ал аспаннан түскен металл Жаратушы құдіретті және аспанмен байланысты білдіретін символ түрінде пайдаланылған.
Бұл мұхит түбінде бөтен ғаламшардың белгілерін табу сияқты қызықты болмаса да, «ежелгі дәуірлердегі қоғамдар өздерінің нанымдары мен технологияларына бөтен металдарды қалай енгізген?» деген құпияны ашу үшін маңызды.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.