Бірінші оқылымда Мәжіліс депутаттарына денсаулық сақтау саласындағы нормалардың артық (шамадан тыс) заңнамалық регламенттелуін болғызбау мәселелері бойынша заңнамалық өзгерістерді талқылау ұсынылады. Атап айтқанда, «Халық денсаулығы және денсаулық сақтау жүйесі туралы» Кодекс деңгейінде уәкілетті органның нұсқаулықтар, алгоритмдер мен регламенттерді, мамандықтар номенклатурасын, қызметкерлер лауазымдарының біліктілік сипаттамаларын, денсаулық сақтау саласындағы көрсеткіштерді қалыптастыру әдістемесін әзірлеу және бекітуге қатысты өкілеттіктері мен басқа да бірқатар норма алынып тасталады.
Мәжілістің жалпы отырысының күн тәртібіне түркітілдес мемлекеттердің ынтымақтастық кеңесін құру туралы Нахчыван келісіміне өзгерістер енгізу туралы және Еуразиялық экономикалық одаққа мүше мемлекеттердің арасында кедендік әкелу баждарының сомаларын аударуға қатысты бөлікте өзгерістер енгізу туралы хаттамаларды ратификациялау туралы заң жобалары да енгізілген.
Сондай-ақ депутаттар аңшылық саласы және жануарлар дүниесін сақтау жөніндегі жаңа заң жобаларын жұмысқа алатын болады.