Оған әр салада еңбек етіп жүрген жұмысшы әйелдер қауымы қатысты. Мұндағы мақсат – тұрғындар арасында еңбек адамының беделін биіктету, соның ішінде ер-азаматтармен қатар жүйелі жұмыс істеп жүрген әйелдердің қалтқысыз қызметін ұлықтау.
Іс-шараға қатысушылар өз еңбек жолы, мамандық таңдауы, отбасының қолдауы, өмірде кездескен қиындықтары, кәсіп игеру қадамдары туралы айтты. Сондай-ақ форум жұмысы аясында өңірдің экономика, ауыл шаруашылығы және өндіріс салаларының дамуына үлес қосып, тұрғындарды жұмыспен қамтып келе жатқан мекеме басшыларының еңбегі ескерілді.
«Сіздер тұрақты жұмыс орындарын құрып, өңір дамуына өлшеусіз үлес қосып келесіздер. Осы орайда Өздеріңізге әр қызметкерге жіті көңіл бөліп, қамқорлық жасап жатқандарыңыз үшін айрықша алғысымды білдіремін. Алдағы уақытта да тығыз жұмыс істеп, байланысымызды нығайта түсеміз деген сенімдемін», – деді «AMANAT» партиясы Батыс Қазақстан облыстық филиалының атқарушы хатшысы Азамат Сафималиев.
Сөз соңында ол жұмысшы мамандықтарды игеріп, еселі еңбек етіп жүрген әйелдер қауымына алғысхат табыстады. Сонымен қатар тұрғындарды жұмыспен қамтып, өңірдің экономикалық, аграрлық жағдайын жақсарту ісіне үлес қосып отырған әйел басшылар да дәл осындай марапатқа ие болды.