АҚШ-тың жаңа кедендік тарифтері аясында Stellantis компаниясы Мексиканың орталық бөлігіндегі зауытында өндірісті уақытша тоқтатты, – деп хабарлайды Аikyn.kz
Associated Press мәліметінше, Jeep пен Ram маркаларын шығаратын концерн басшылығы тарифтердің өндірістік тізбектерге ықпалын бағалау мақсатында осындай шешім қабылдаған. Толука қаласындағы зауыт жұма күні бір айға жұмысын тоқтатты.
Компанияның бейсенбіде хабарлауынша, өндірістің уақытша тоқтауы тек Мексикамен шектелмейді — Канаданың бір зауытында да осындай шара қолданылады. Сонымен қатар, Stellantis АҚШ-тың Мичиган және Индиана штаттарындағы кәсіпорындарында 900 жұмысшыны уақытша еңбек демалысына жібермек.
АҚШ президенті Дональд Трамп өткен аптада шетелдік көліктерге 25 пайыздық импорттық баж салығын енгізетінін мәлімдеген болатын. Алайда Мексика үкіметі Солтүстік Америка еркін сауда келісіміне (USMCA) сүйене отырып, отандық автокөлік өндірісі бұл талаптардан босатылады деп үміттеніп отыр.
Сәрсенбі күні Ақ үй әлемнің ондаған сауда серіктесіне қатысты "айналымды" тарифтер жариялағанымен, Мексика бұл шектеулерден сытылып шықты.
Ал бейсенбі күні зауытқа келген кейбір жұмысшылар өндірістің тоқтайтыны жайлы ресми ақпарат әлі жетпегенін айтқан.
Мексика президенті Клаудиа Шейнбаум жұма күні бұл жағдайға қатысты пікір білдіріп, елдің экономика министрі Stellantis компаниясының басшылығымен байланыс орнатқанын хабарлады. Ол өндірістің уақытша тоқтауын аса маңызды мәселе ретінде бағаламайтынын мәлімдеді.
Сараптама, зерттеу мақала, күнделікті өзекті ақпаратты «Айқынның» Telegram арнасынан таба аласыз