Жиынға Мәдениет және ақпарат министрі Аида Балаева, Meta вице-президенті доктор Саймон Милнер, Бала құқықтары жөніндегі уәкілі Динара Закиева, Ішкі істер министрі Ержан Сәденов және Цифрлық даму министрі Жаслан Мадиев, сондай-ақ мемлекеттік органдардың, академиялық және азаматтық сектордың, сондай-ақ жастар ұйымдарының шамамен 100 өкілі қатысты.
Іс-шара аясында жасөспірімдерді цифрлық қорғау, кибербуллингтің алдын алу, зиянды контентке қолжетімділікті шектеу мәселелері қарастырылды. Жасөспірімдерге арналған аккаунттарды енгізу жас ерекшеліктері мен халықаралық стандарттарды ескере отырып, олардың қауіпсіз цифрлық ортасын қалыптастыруға бағытталған.
Meta компаниясының Азия-Тынық мұхиты өңіріндегі қауіпсіздік саясаты жөніндегі жетекшісі доктор Приянка Балла жасөспірімдерге арналған аккаунттардың ерекшеліктерін атап өтті. Бұл аккаунттар хат алмасуға, контент көруге, басқа қолданушылармен қарым-қатынасқа шектеулер, сондай-ақ интернетте өткізілген уақытты бақылауға арналған функцияларды қамтиды. Жаңа жоба халықаралық зерттеулер мен ата-аналармен жүргізілген кеңестер негізінде әзірленіп, кибербуллинг пен зиянды контентке байланысты қауіптерді азайтуға бағытталған. Teen Accounts-ты енгізу елімізде жасөспірімдердің жасына сәйкес келетін және ата-аналар болжамына жауап беретін қауіпсіз цифрлық орта қалыптастыру жолындағы маңызды қадам болады деп күтілуде.
Презентациядан кейін Қазақстандағы жастар цифрлық қауіпсіздігінің перспективалары тақырыбында панельдік талқылау өтті. Оған Meta, Оқу-ағарту министрлігінің Балалар құқығын қорғау комитеті, ІІМ, Мәдениет және ақпарат министрлігі, ЮНИСЕФ, сондай-ақ сарапшылар мен үкіметтік емес ұйым өкілдері қатысты.
Айта кетейік, бұл шара Meta Қазақстан Республикасындағы Бала құқықтары жөніндегі уәкілмен бірлесіп, Мәдениет және ақпарат министрлігінің қолдауымен жүзеге асты.
Ақгүл Саятқызы