2025 жылдың 15 тамызында Алматы қаласындағы Бас ботаникалық бақта экология мен инклюзияға арналған жыл сайынғы екінші InEco Fest 2025 фестивалі өтеді. Іс-шараны ITeachMe қоры Ботаника және фитоинтродукция институтымен (Алматы қаласындағы Бас ботаникалық бақ) бірлесіп, «Шеврон» компаниясының серіктестігімен ұйымдастырады, – деп хабарлайды Аikyn.kz.
Фестивалінің мақсаты – әрбір адам өзінің мүмкіндігіне қарамастан өзін еркін көрсете алатын, шабыт беретін, инклюзивті және экологиялық орта қалыптастыру. Бұл – табиғатпен қатар, адамдар арасындағы қарым-қатынаста да жауапкершілік пен қамқорлықты бағалайтын жандарға арналған фестиваль.
Биыл фестивальге 4000-нан астам қонақтар, балалар, ересектер, мүгедектігі бар балалар тәрбиелеп отырған отбасылар, бизнес өкілдері мен үкіметтік емес ұйымдар қатысады деп күтілуде.
Оның ерекшелігі – басқосу ойын түріндегі квест форматында өтеді. Қонақтар әрбір белсенділікке қатысқаны үшін шағын сыйлық – моншақ алып отырады. Түрлі алаңдарды аралап, белсенділік танытқан қонақтар фестиваль соңында өз қолымен бірегей жасалған білезік құрастырады. Білезік – саналы қоғам құру жолындағы жеке үлестің символы болмақ.
Фестивальдің ерекше сәттерінің бірі – мүгедектігі бар қыз-келіншектер қатысатын инклюзивті сән көрсетілімі болмақ. Бұл көрсетілім – сұлулық пен тең мүмкіндіктердің нышаны ретінде есте қалады.
12:00 мен 16:00 аралығында фестиваль аумағында 8 тақырыптық алаң жұмыс істейді. Қонақтарды түрлі шеберлік сабақтары, интерактивті ойындар, балаларға арналған ертегі-аудио саяхат, ботаникалық бақ бойынша экскурсиялар, эко-жәрмеңке және қайырымдылық маркет күтеді.
16:00-ден 20:00-ге дейін Бас сахнада танымдық дәрістер мен перфоманстар өтеді. Фестивальдің бас жүргізушісі – театр және кино актері Чингиз Капин. Кештің соңында көрермендерге ARTиШОК театры әртістерінің өнері мен режиссер Қанат Бейсекеевтің Алматыдағы смог мәселесіне арналған деректі фильмі ұсынылады.
Фестивальге қатысу — Ботаникалық бақтың стандартты кіру билетімен. Отбасыңызбен бірге келіп, шабыт алып, жақсы көңіл-күймен қайтыңыздар!