Мәжіліс депутаты, «AMANAT» партиясы фракциясының мүшесі Ерболат Сатыбалдин Ұлытау облысында «Жезқазған – Қызылорда» тасжолының жағдайымен танысты. Аймақта «Қызылорда – Жезқазған» автожолының 200 шақырымнан астам бөлігі реконструкциядан өтуде. Жұмыс барлық учаскеде жүріп жатыр. Кейбір учаскелерде уақытша айналма жолдар арқылы қозғалыс ашылды, жаңа жолдың алғашқы шақырымдары төселуде, су өткізгіш құбырлар мен көпір тіректері орнатылуда. Шымтезек, битум және басқа да құрылыс материалдары Қазақстандағы карьерлер мен зауыттардан жеткізілуде. Депутат жөнделіп жатқан жолдардың сапасы мәселесін жеке бақылауына алып, мердігерлерге жұмыс қарқынын жеделдету қажет екенін айтты.
Жетісу облысына жұмыс сапары аясында Мәжіліс депутаты Азат Перуашев жақында Талдықорғанда ашылған ASMA Industrial заманауи өндірістік аккумулятор зауытын аралап көрді. Кәсіпорында электр техникасы, энергетика, телекоммуникация, жаңартылатын энергия көздерінде электр қуатын жинақтау үшін пайдаланылатын аккумуляторлар өндіріледі. Кәсіпорынды аралау барысында депутат шикізат жеткізу, салық салу және басқа да бірқатар мәселеге назар аударды.
Сондай-ақ Мәжіліс депутаты Наурыз Сайлаубай Қапшағайдағы №6 жағажайда жұмыс істейтін кәсіпкерлермен кездесті. Басқосуда жағалау аумағын абаттандыру, инфрақұрылымды жаңғырту және бизнестің мүддесін қорғау мәселелері талқыланды. Басқосуда кәсіпкерлер инженерлік коммуникациялардың жоқтығы, кешенді абаттандырудың қажеттілігі мен әкімшілік шектеулер сияқты бірқатар мәселеге назар аударды.
Шымкент қаласында жол-көлік инфрақұрылымын жаңғырту аясында Момынов көшесінде теміржол үстінен жаңа автокөлік өткелі салынып жатыр. Мәжіліс депутаты, «AMANAT» партиясы фракциясының мүшесі Болатбек Нажметдинұлы құрылыс барысымен танысып, бұл жоба қаладағы қозғалысты жеңілдетіп қана қоймай, кептелістерді азайтып, жол қауіпсіздігін арттыратынын атап өтті. Жоба аясында төрт жолақты өткелде жаяу жүргіншілерге арналған жол және бағдаршамдар орнатылады. Құрылыс 2024 жылғы қарашада басталды, қазір нысанның 50 пайызы дайын. Мердігер ұйымның мәліметінше, жұмыс жоспарға сәйкес жүріп жатыр. «Шымкент – еліміздегі ең қарқынды дамып келе жатқан қала. Оның жол желісі жаңартуды қажет етеді. Жол өткел «AMANAT» партиясының сайлауалды бағдарламасы аясында салынып жатыр және бұл – біздің сайлаушыларға берген нақты уәделеріміздің бірі. Мен осы жобаның бағдарламаға енуіне бастамашы болып, қаржы бөлінуіне ықпал еттім. Қазір нысанның құрылысы сәтті іске асуда, оны жеке өзім бақылауда ұстаймын, – деді Болатбек Нажметдинұлы.
Ал Мәжіліс депутаты, «AMANAT» партиясы фракциясының мүшесі Самат Мұсабаев Жаңаөзен қаласына барды. Мұнда депутат газ өңдеу зауытының құрылысымен танысты. Жоба құны 216,8 млрд теңгені құрайды. Құрылыс-монтаж жұмысы биыл 3 наурызда басталды. Жаңа нысанның қуаты жылына 900 миллион текше метр табиғи және ілеспегаз өндіруге қауқарлы. Бұл – еліміз үшін аса маңызды стратегиялық нысан. Жобаны 2027 жылға дейін жүзеге асыру жоспарланып отыр. «Жаңаөзен қаласында жұмыс істеп тұрған ескі Қазақ газ өңдеу зауыты сонау 1973 жылы ашылған еді. Өндіріс қуатын арттыру мақсатымен салынып жатқан жаңа зауыт сұйытылған газ тапшылығын жояды. Нысан құрылысы талапқа сай салынып, белгіленген мерзімде аяқталуға тиіс. Бұл жұмыс ұдайы біздің бақылауымызда болады», – деді депутат Самат Мұсабаев.
Алматыда Мәжіліс депутаты Кенжеғұл Сейтжан зағип және нашар көретін азаматтарға арналған республикалық кітапханада өткен параспортты дамыту мәселелеріне арналған дөңгелек үстелге қатысты. Депутат Кенжеғұл Сейтжан өз сөзінде спорттың, әсіресе мүмкіндігі шектеулі жандар үшін, ерекше шабыт беретінін атап өтті.
Талқылау барысында параспорт түрлерін жастар арасында танымал ету, жарыстарды ұйымдастырудағы инфрақұрылымды жақсарту, халықаралық тәжірибе алмасу, қаржыландыруды ұлғайту және қоғамда параспортты насихаттау мәселелері көтерілді.
Мейір ЖАСЫН