Бұл – күн-түн демей, қауіп пен қатерге қарсы тұрып, адам өмірін құтқарып жүрген жандардың ерлігіне бас иетін ерекше сәт. Құтқарушылар мен өрт сөндірушілердің жұмысын жай ғана мамандық ретінде бағалау жеткіліксіз. Төтенше жағдайлар министрлігінің 30 жылдық мерейтойы қарсаңында біз өз өмірін қатерге тігіп, ерлік танытып, адал қызмет атқарып жүрген жандарға хабарластық.
Алмас ҚАЛИЕВ,
Павлодар облысы ТЖД офицері,
«Ерлігі үшін» медалінің иегері:
Қайсарлықты шыңдайтын сала
Қызметімді Шідерті ауылынан бастап, өрт сөндіру ісінің қыр-сырын сол жерде меңгердім. Кейін Ақсу, Екібастұз және Павлодар қаласындағы өрт сөндіру бөлімдерінде жұмыс істеп, қарауыл бастығы лауазымында қызмет атқардым.
2024 жылдан бастап Павлодар облысы ТЖД Өрт сөндіру және авариялық-құтқару жұмыстары ұйымдастыру басқармасында жедел кезекшінің көмекшісі лауазымында қызмет етемін. Бірнеше мәрте ірі өрт пен құтқару операцияларын жоюға қатыстым.
Былтыр қаңтарда Павлодар қаласындағы көпқабатты тұрғын үйдің бір пәтерінде өрт шықты. Өрт сөндірушілер 13 адамды, оның ішінде төрт баланы қауіпсіз жерге эвакуациялады. Аса қауіпті жағдай сегізінші қабаттағы балконда қалған кішкентай қызға қатысты болды. Қатты түтін шығып жатыр, тәуекел етіп газ-түтіннен қорғау қызметі бөлімшесімен бірге әрекет жасап, «Фенист» құтқару құрылғысының көмегімен баланы аман алып шықтық. Қыздың отбасы үшін бұл есте қаларлық оқиға болды.
Еңбегіміз еленіп, биыл мамырда Президенттің Жарлығымен мемлекеттік награда – «Ерлігі үшін» медалімен марапатталдым. Бұл жоғары марапат біздің жұмысымызға адалдығымызды еселейді.
Әлиасқар АЙТЖАНОВ,
Жамбыл облысы ТЖД аға анықтаушысы
азаматтық қорғау майоры:
Әулетіміздің айрықша мамандығына айналды
Мен Ресейдің Азаматтық қорғаныс істері, төтенше жағдайлар және табиғи апаттар салдарын жою жөніндегі мемлекеттік өртке қарсы қызмет академиясының түлегімін. «Өрт қауіпсіздігі» мамандығы бойынша білім алып, әскери іс және қауіпсіздік саласында біліктілігімізді арттырдық. Азаматтық қорғау органдарында 2018 жылдан бастап қызмет атқарамын.
Бұл мамандық менің басты құндылығым – отбасыммен байланысты. Себебі менің әкем де осы салада 25 жылдан астам қызмет атқарды. Әпкелерім де осы салада жүргенін мақтан етемін. Бала күнімнен әкемнің жұмысына адал берілгенін көрдім. Ерліктерін, өмірін естіп өстік.
Үлкен әпкем ТЖД азаматтық қорғау органдарында қызмет етсе, екінші әпкем жұбайымен бірге Астана қаласының азаматтық қорғау гарнизонында жұмыс істейді. Отбасымыздың бұл мамандыққа сүйіспеншілігі зор.
Рамазан ҚАБДУАЛИЕВ,
ШҚО ТЖД Октябрьский кенті
20-ӨСБ-нің азаматтық қорғау аға сержанты:
Біздің міндет – тілсіз жауды ауыздықтау
Біз 19 қазан – Құтқарушылар мерекесін айрықша қарсы аламыз. Өз арамызда бір-бірімізді төл мерекемен құттықтап, мәз-мейрам боламыз. Жылына бір келетін атаулы дата біздің ғана емес, отбасымыздың да қуанышы саналады. Өйткені біз осы салада еңбек етіп, тапқан табысымызбен отбасымызды асыраймыз.
Жұмысымыз нағыз от пен судың қарқынына төтеп беру іспетті. Табиғаттан, тұрмыс-тіршілік салдарынан шығатын түрлі апаттан халықты қорғауға тырысамыз. Әрбір апат шығынсыз болмайды. Әлбетте, дүниенің жанып, суға ағып, бүлініп, жарылып жатуы мүмкін. Басты мүдде – адам шығынына жол бермеу. Себебі адам жараланып күйіп қалса, оның артында отбасы, ағайын-туысы тұрады. Сондықтан адамзатқа қауіп төнбеу керек деп санаймыз.
Өзім Төтенше жағдай қызметінде 5 жылға жуық қызмет істеп келемін. Бір ерекше жағдай ойға оралып тұр. Ең алғаш жұмысқа түскеннен бір ай өтпей Бұқтырма маңында өртпен бетпе-бет келдік. Содан жанып жатқан өртті ұлғайтпау үшін газ баллондарды сыртқа алып шығып, эвакуацияладық. Кез келген сәтте қолыңдағы зат жарылуы мүмкін, сондықтан өте ауыр жұмыс. Тағы бір жағдайды айта өтейін. Бір жылдары Өскемен маңындағы «Северный» деген жерде өрт шығып, жайпап бастады. Күн қатты ыстық болса да, лапылдаған жалынды өшіріп, елді мекенге зиян келуін тоқтаттық. Әйтпесе, тілсіз жау жел тұрса, қалаға қарай ұшқындап, халыққа зиян тигізуі мүмкін еді. Осындай ауырлыққа төзіп жүрген құтқарушыларға төл мерекеміз жақсылық алып келе берсін!
Мұрат МҰХАНОВ,
Маңғыстау облысы ТЖД бастығы, полковник:
Азаматтық парыз, кәсіби міндет – бәрінен маңызды
Төтенше жағдайлар қызметі – ең күрделі әрі жауапкершілігі жоғары салалардың бірі. Біз үшін әр күн – жаңа сынақ. Өрт сөндірушілердің ісі көбіне адам өмірі мен мүлкін сақтап қалуға бағытталған.
Біздің қызметтің ең басты ауыртпалығы уақытпен жарысу дер едім. Кез келген секунд адам тағдырын шешуі мүмкін. Қатты ыстық, аяз, түннің ортасында түрлі апат пен техногендік төтенше жағдайларда құтқарушылар бірінші болып оқиға орнына барады. Сонымен қатар бұл салада тек физикалық төзімділік емес, моральдық тұрақтылық та аса маңызды. Кейде құтқару кезінде адам өмірін сақтап қалу мүмкін болмайтын жағдайлар ұшырасады. Сондай сәттерде біздің қызметкерлер сабыр мен рух биіктігін сақтауы керек.
Қызмет жылдарымда түрлі төтенше жағдайға тікелей қатыстым. Жаңаөзен қаласындағы тұрғын үйдегі жарылыс, Мұнайлы ауданындағы автоцистерна соқтығысуы, ұшақ апаты мен бірқатар жағдай есте қалды. Мұндай жағдайларда ең негізгісі – адамдардың өмірін сақтап қалу. Жарылыс қаупі, улы түтін, басқа да талай қауіпті факторлар болды. Сондай сәттерде құтқарушылардың кәсібилігі, төзімділігі, ұйымшылдығы негізгі рөл атқарады. Төтенше жағдай кезінде әр секунд бағалы. Сондай сәтте әрдайым дайындықта болып, кез келген шақыртуға әзір болуымыз керек. Осындай сын-сәттерде елге адал қызмет етудің, командалық рухтың және азаматтық қызметтің маңызы айқын сезіледі.
Дайындаған Олжас ЖОЛДЫБАЙ