Сенат депутаты Бибігүл Жексенбайдың айтуынша, Қазақстан мен Ресей арасындағы байланыс – өткенге құрмет, болашаққа жауапкершілік. Депутат Қасым-Жомарт Тоқаевтың Мәскеуге мемлекеттік сапары аясында қол қойылған 13 құжаттың әрқайсысы болашаққа бағытталған нақты қадам екенін атап өтті, – деп хабарлайды Aikyn.kz.
«Кейде саясат пен тарихты түсіну үшін үлкен сөздердің қажеті жоқ. Бүгін Мемлекет басшысы Қасым-Жомарт Тоқаевтың Кремль төрінде айтқан бірауыз сөзі бәрін түйіндеді: «Ресей – Қазақстанның Құдай қосқан көршісі».
Бұл – дипломатиялық әсем тіркес емес, тағдырдың шындығы.
Тарих бізді бір өзеннің екі жағасына орналастырып, бір аспанның астында өмір сүруге жазған. Қиын жылдарда да, бейбіт күндерде де біз бір-бірімізбен қатар жүрдік. Бүгінде сол сабақтастық жаңа мазмұнға ие болып отыр.
Қол қойылған 13 құжаттың әрқайсысы болашаққа бағытталған нақты қадам: экономика мен көлік, ғылым мен экология, қауіпсіздік пен білім саласындағы ынтымақтастық. Бірақ олардың ең бастысы – сенім. Сенім болмаса, ешбір келісім өміршең болмайды.
Қазақстан мен Ресей арасындағы байланыс географияның ғана емес, уақыттың да аманаты.
Көрші елмен достық қарым-қатынас орнату бұл саясат емес, бұл – өмірдің заңы. Өйткені көршіңмен тату болмасаң, өз үйіңде де тыныштық болмайды.
Біздің елдің сыртқы саясатының мәні де осы – теңдік пен сыйластыққа негізделген бейбіт көршілік.
Құдай қосқан көршімен арадағы бүгінгі байланыс – өткенге құрмет, болашаққа жауапкершілік», – деді Бибігүл Жексенбай.