Жиында партияның сайлауалды бағдарламасы аясында мүгедектікті проактивті сырттай орнату тетігін енгізу, сондай-ақ Ақтөбе, Жамбыл және Павлодар облыстарында «Кедергісіз келешек» партиялық жобасының іске асырылу барысы қаралды.
Жиынға кеңес мүшелері, орталық мемлекеттік органдардың өкілдері және Халыққа қызмет көрсету орталықтарының қызметкерлері қатысты. Сондай-ақ бейнеконференцбайланыс режимі арқылы партияның өңірлік филиалдарының өкілдері қосылды.
Мемлекет басшысы Қасым-Жомарт Тоқаев мүгедектігі бар адамдарды қолдау мәселесіне жіті назар аударып келеді. Президент өз сөзінде ерекше қажеттілігі бар адамдарды және олардың күтушілерін қолдау шараларын күшейту қажет екенін атап өткен еді. Бұл ретте «AMANAT» партиясы жанындағы Мүгедектігі бар адамдардың инклюзиясы жөніндегі республикалық кеңес кедергісіз орта құру, инклюзивті қоғам қалыптастыру, мүгедектігі бар отандастарымыздың тұрмысын жақсарту бағытында жүйелі жұмыс жүргізіп келеді.
Мәжіліс депутаты, кеңес төрағасының орынбасары Ерлан Әбдиев биыл партия жанындағы кеңестің 5 отырысы өткенін мәлімдеді. Осы кезеңде инклюзивті білім беру, медициналық және әлеуметтік қолдау көрсету, инфрақұрылымдардың қолжетімділігін арттыру, ерте араласу және оңалту орталықтарының жұмысын жетілдіру, «Қамқорлық» бастамасы мен мүгедектікті проактивті анықтау мәселелері жүйелі түрде талқыланды. Нәтижесінде, мемлекеттік органдарға 22-ден астам ұсыныс жолданды.
«Мүгедектігі бар азаматтардың тұрмысын жақсарту мәселесі партия мүшелерінің, ең алдымен, Мүгедектігі бар адамдардың инклюзиясы жөніндегі республикалық кеңестің тұрақты назарында. Басты мақсат – партияның сайлауалды бағдарламасын жүзеге асыру, сондай-ақ қолданыстағы заңнаманы кешенді түрде жетілдіру. Биыл «Кедергісіз келешек» партиялық жобасы аясында 4,1 мыңнан астам іс-шара өткізіліп, онда 62,2 мыңға жуық адам қамтылды», – деді ол.
Партияның сайлауалды бағдарламасы аясында мүгедектікті проактивті сырттай орнату тетігін енгізу мәселесі туралы Еңбек және халықты әлеуметтік қорғау министрлігі Халықты әлеуметтік қорғау саласындағы реттеу және бақылау комитетінің төрағасы Илья Скуб баяндады. Ол медициналық-әлеуметтік сараптаманың проактивті сырттай форматы мүгедектікті белгілеу рәсімін жеңілдетіп, азаматтардың жол жүру уақытын қысқартуға және медициналық-әлеуметтік сараптама бөлімшелеріне жеке келу қажеттілігін жоюға бағытталғанын атап өтті.
Өз кезегінде Денсаулық сақтау вице-министрі Әлия Рүстемова профилактикалық медицина мен оңалту шаралары туралы айтты.
«Елімізде профилактикалық медицина, ерте диагностика және медициналық оңалту бағыттары жүйелі түрде жетілдірілуде. Бүгінде балалар арасындағы мүгедектікті ерте жастан анықтау үшін неонаталдық, аудиологиялық, офтальмологиялық және психофизикалық скринингтер жүргізіліп, жыл сайын 4,5 миллионға жуық бала профилактикалық тексеруден өтуде. 2020 жылдан бастап іске қосылған ерте араласу орталықтары 0-3 жас аралығындағы балалардың көмекті уақытылы алуына мүмкіндік беріп отыр. Соңғы жылдары медициналық оңалтуға бөлінетін қаржы бірнеше есе артып, оңалту орталықтары желісі кеңейтілді. Сонымен қатар Еңбек және халықты әлеуметтік қорғау министрлігімен бірлесіп, 70-тен астам ауру бойынша мүгедектікті проактивті форматта белгілеу тәртібі оңтайландырылды», – деді ол.
Айта кетейік, партия ерекше қажеттілігі бар азаматтарды қолдау, олардың қоғам өміріне толыққанды араласуына жағдай жасау және әлеуметтік құқықтарын қамтамасыз ету бойынша жүйелі жұмыс жүргізіп келеді. Осы бағытта партияның сайлауалды бағдарламасы аясында аутизм спектрінің бұзылыстары бар балаларға арналған 13 ерте араласу орталығы және «Қамқорлық» бастамасымен аудандық деңгейде 6 оңалту орталығы ашылды. Партияның Әйелдер қанаты инклюзивті орта қалыптастыруға ықпал ету мақсатында «Тең мүмкіндіктер» республикалық спорт фестивалін өткізіп келеді. Сонымен қатар «Кедергісіз келешек» жобасы аясында жыл сайын ерекше қажеттілігі бар жандарға «Жан Шуақ» халықаралық қоғамдық сыйлығы табысталады. 2025 жылы партия филиалдары жергілікті атқарушы органдармен бірлесіп, мүгедектігі бар адамдарды жұмыспен қамтуға бағытталған 510 бос жұмыс орындары жәрмеңкесін өткізіп, нәтижесінде 1,4 мыңнан астам адам тұрақты жұмысқа орналасты.
Ә.САМАТҰЛЫ