Танымал продюсер әрі әнші Қайрат Нұртастың әкесі Нұртас Айдарбеков немерелерімен бірге түскен жүрек елжіретер видеосымен әлеуметтік желі қолданушыларының ықыласына бөленді, – деп хабарлайды Aikyn.kz сайты.
Продюсер жұбайы Гүлзира Айдарбековамен бірге немерелеріне қуаныш сыйлаған ерекше сәтін әлеуметтік желідегі парақшасында жариялаған. Бейнежазбада ата мен әженің кішкентай немерелеріне киім-кешек тарту етіп, шынайы мейірім мен жылылық танытқаны көрініс тапқан.
Жылы атмосфераға толы видео желі қолданушыларының жүрегін жаулап, көптеген жағымды пікірлерге ие болды. Оқырмандар пікірлерінде:
«Керемет ата-әже! Немерелерін еркелетіп, шын жүректен қуанта біледі», «Немерелеріне деген махаббаттары ерекше сезіледі», «Ата мен әже ұзақ ғұмыр сүрсін», «Немерелерінің қызығын көріп, аман-сау жүре берсін» деген ізгі тілектерін білдірді.
Сондай-ақ көпшілік Нұртас Айдарбековтің немерелерімен заманауи форматта, жақын әрі шынайы қарым-қатынас орната отырып, видео түсіргеніне ерекше назар аударып, бұл әрекетті отбасылық құндылықтарды насихаттайтын тамаша үлгі ретінде бағалады.