Адалдықтың бастауы ананың ақ сүтімен, әкенің қанымен беріліп, отбасындағы дұрыс бағыттағы тәрбиемен, қоршаған ортаның әсерімен қалыптасады. Әлеуметтік желі дамыған кезде қоршаған ортаның ұрпаққа әсерін айтпай кету әлемге көз жұма қараумен бірдей. Адал еңбекпен қатар қоғамдық этика дамып, жанашырлық, мейірім ұғымдары бойға сіңіп, еңбекқор ұрпақ тәрбиеленеді. Мемлекет басшысының жасампаздық, шынайы патриотизм туралы сөздері Адал адам ұғымын ашатын түйін сөздер. Жасандылық, ұрандатып айтылатын әдемі сөздердің іші кеуек, қуыс, тұяғы тез сүрінетін алысқа шаппайтын ат сияқты дүбірі естілгенмен дүмпуі аз. Адал адамның қай фармацияда болмасын қалыптасуына әйелдің рөлі ерекше, ал әділетті мемлекет құрудағы әйелдің әлеуеті жоғары ер-азаматтардан бірде-бір кем емес. Әйелдер отбасы құндылықтарын сақтай отырып, түрлі салада қызмет атқаруда. Әйелдердің гендерлік теңдік қағидаттарын тұрақты түрде ілгерілетуге, әйелдерді қоғамдық-саяси және әлеуметтік-мәдени өміріне тарту мақсатында Парламент Мәжілісінің Төрағасы, «AMANAT» партиясының Төрағасы Ерлан Қошановтың бастамасымен әйелдер қанаты құрылып, міндеттер, мақсаттар айқындалды. Әйелдер қанатының 10 басымдығы айқындалды.
1. Әйелдердің саяси көшбасшылығын қолдау;
2. Әйелдер зорлық-зомбылыққа қарсы;
3. Инклюзиялық қоғамның дамуына жәрдемдесу;
4. Психологиялық қызмет институтын құруға және қызмет етуіне жәрдемдесу;
5. Өндірістегі әйел;
6. Ауылдық жерде әйелдердің бизнесін дамытуға көмектесу;
7. Әйелдердің денсаулығын және отбасы институтын нығайтуға көмектесу;
8. Гендерлік сараптама мен гендерлік теңдікті ілгерілету;
9. Әйелдердің экономикалық құқықтарын және мүмкіндіктерін тұрақты кеңейту және дамыту;
10. Ғалым-әйелдер – Қазақстан ғылымының көшбасшылары.
Өңірлерде әйелдер қанаты жетекшілері тағайындалып, Түркістан облысынан мені бекітті.
«Әлемнің жарығын сыйладың сен маған» деп әлемге ән салдырған Шәмші елінің, топырағы киелі, тірлігі жүйелі қасиетті Түркістан өңірінің әйелдері «AMANAT» партиясының әйелдер қанаты ер-азаматтардан қалмай ел дамуына үлес қосып, ұрпақ тәрбиелеуде өнеге көрсетуде. Әйелдер қанатының 10 басымдығы бағытында облыста топ жетекшілері және әрбір аудан қалаға белсенді, мықты әйелдерден жетекшілер бекітілді.
Әйелдер қанатының жетекшісі ретінде жыл басынан бері бір ғана менің парақшамда 1115, БАҚ-тарда 225 материал жарық көрді.
Облыста «Әйел аманаты» телебағдарламасы іске қосылып, жұмысшыдан бастап танымалдыққа ие болған мықты әйелдер туралы түсірілімдер түсірілуде, әр ай сайын әйелдер қанатының бағыттары осылайша насихатталуда.
Мемлекет басшысы Қасым-Жомарт Тоқаевтың Жолдауларын насихаттауда әйел насихатшылар санын әйелдер қанаты көбейте түсуде. Үгіт-насихат топтары қатарына аудан, қалалардағы жетекшілеріміз енді.
Ғылымдағы әйелдер тақырыбында Қожа Ахмет Ясауи атындағы Халықаралық қазақ-түрік университетінде өткен дискуссиялық алаңда ғалым әйелдерді толғандыратын тақырыптар талқыланып, ұсыныстар жинақталды.
Жұмысшы мамандықтар жылына орай өткізілген іс-шаралардың жөні бір басқа. Әйелдер қанаты «Әйел басқаратын кәсіпорын» атты әлеуметтік желіде онлайн пікірлесу өтті. Күні кеше Сайрамда Жұмысшы мамандықтар жылы қорытындыланып, үздік әйелдер марапатқа ие болды.
Кәмелетке толмағандарды зорлау ұлтымыздың қадір-қасиетіне нұқсан келтіретін ар-ұятты жиыстырып қою, әлімжеттік мәселесі мейірімнің азайып, рухани азғындағандардың ел ішінде көбеймесе, азаймауы қоғамда алаңдатушылық тудыруда. Әйелдерге психологиялық қолдау мақсатында «Зорлық-зомбылықсыз қоғам» атты форум өткізіліп, қоғамды мейірімге шақырдық. Форумда қазақтың байырғы жолымен ортаға орамал тастап, зорлық-зомбылықты азайтуды үндедік.
Өз қаржыммен түсірілген зорланған қыз туралы «Қошқар атадағы қыз» қысқаметражды фильмім осы форумда көрсетілді.
Зорлық-зомбылықтың алдын алуға арналған брошюралар таратылды.
Әйелдер қанатының «Балаңа уақыт арна» акциясы бойынша, бастауыш партия ұйымдарында 76 іс-шара өтіп, 300-ден аса пост жарияланды. Әйелдің жанын әйел түсінеді. Әйелдер қанатының аудандағы жетекшілері 8 қоғамдық қабылдау өткізіп, 38 әйелдің проблемасының шешілуіне атсалысты.
Әйелдер қанатының денсаулық сақтау басқармасымен бірлесе ұйымдастырған «Денсаулық керуені» елді мекендерді аралап, «Ерте жүктіліктің алдын алу» семинарларын психолог мамандармен, акушер гинекологтармен бірлесіп өткізіп кеңестер берілді.
Ордабасы ауданында және облыстық филиалда банкке 90 күннен аса берешегі бар әйелдерге құқықтық кеңестер беріліп, сот орындаушылармен бетпе-бет шешу жолдары қарастырылды.
«Әйелдерге қолайлы кәсіпорын» әйелдерді қолдау стандарттары бойынша 15 кәсіпорынға зерделеу жұмыстары жүргізіліп, ұсыныстарымызды тиісті мемлекеттік органға жолдадық.
«Жетім көрсең жебей көр» деген Арыстағы балалар үйін бітіруші қыздар мен ұлдарға 3 миллионға киімдер, су тасқынынан зардап шеккен Ақтюбедегі Әлия батырдың ауылына өз отбасымнан 8 млн-ға көмек көрсетілді.
Сондай-ақ өзімнің депутаттық жұмысымның да әйелдер қанатының жұмысына пайдасын көріп жүрмін. Әйелдердің атынан түскен өтініштер ішінде Кентаудағы «Жұлдыз» балабақшасының күрделі жөндеуіне бөлінген 478 млн теңге, Ы.Алтынсарин балалар кітапханасы ересек кітапханаға қосылып кетпесінші деген әйелдердің сұранысына 500 млн теңге бөлінгені депутаттық сауалымның орындалуының арқасы.
Астана қаласында өткен «Тең мүмкіндіктер» спорттық фестивалінде «Ордабасы» командасы спорттың «Жеңіл атлетика» түрінен жүлделі ІІ орынды иемденді.
Облыстық әйелдер қанатының инклюзивті қоғамның дамуына жәрдемдесу бағыты бойынша жетекшісі Рухабза Халдарбектің ұйымдастыруымен облыста бірінші рет «Дара ұрпақ» инклюзивті театры ашылып, ерекше балаларға жаңажылдық сыйлық табысталды.
Әйелдер қанаты заңнамаларға өзгерістер енгізу бойынша Қылмыстық кодекстің 121-бабы 1-тармағына, Сайлау туралы заңның 97-1 бабының 5-тармағына, Мемлекеттік әлеуметтік медициналық сақтандыру бойынша 22 ұсыныс жолданды.
Әйелдердің саяси көшбасшылығын қолдау бойынша 100 белсенді әйелдің тізімі аудан қала әкімдерімен бірлесе зерделеніп, базасы жасақталды. Облыстық филиал жанынан «Бөрте» әйелдердің саяси көшбасшылық мектебі ашылды. Мектеп науқан емес тоқсан сайын оқу күнтізбелік жоспармен жұмыс істеп жатыр.
Әйелдер қанатының мақсаты – гендерлік проблемаларды шешуге белсенді атсалысатын мүдделі қоғамдық-саяси күштерді ел дамуының стратегиясына бағытталған адами капиталды қолдайтын бір мақсатқа біріктіру арқылы гендерлік теңдікті қамтамасыз ету. Бұл – жүйелі еңбек пен үлкен жауапкершілікті қажет етеді. Бүгінде әйел – ғалым, дәрігер, құрылысшы, мемлекеттік қызметкер, сан түрлі мамандық иесі, өз ісінің маманы, ең бастысы дүниеге ұрпақ әкелуші аяулы ана. Әйелдің тағдырын әйел тез түсінеді. Әйелдер жасаған талдаулар, зерделеулер өте тиянақтылықпен ерекшеленеді. Әйелдің жанының нәзіктігіндей бастаған идеялар да икемді, орындалу мүмкіндігі жоғары.
Әйелдер қанатының әлеуетін толық пайдаланып, жаңа жобаларды жүзеге асыру, жастармен және көпбалалы отбасылармен жұмысты күшейту, сондай-ақ азаматтық бастамаларды қолдау бағытындағы жұмыстар жалғасын табатын болады. Әйелдер қанаты партияның гендерлік саясатын жүзеге асыруда азаматтық қоғамды жұмылдыруға әрекет етеді.
Қалыйма ЖАНТӨРЕЕВА,
«AMANAT» партиясы Түркістан облыстық
филиалы атқарушы хатшысының орынбасары,
облыстық әйелдер қанатының жетекшісі