Кездесуге Сайрам ауданы әкімінің орынбасары Руслан Мұздыбаев, «AMANAT» партиясының Сайрам аудандық филиалының атқарушы хатшысы Қуаныш Сыздықов, аудандық мәслихат депутаттары және аталған ауыл округтерінің әкімдері қатысты.
Жиында сөз алған Алтынсары Үмбетәлиев партияның сайлауалды бағдарламасының орындалу барысына жан-жақты тоқталып, ауыл тұрғындарының әлеуметтік-экономикалық жағдайын жақсартуға бағытталған нақты индикаторлар мен міндеттердің іске асу деңгейін атап өтті. Партия үшін сайлауалды бағдарлама жай ғана құжат емес, нақты жауапкершілік пен өлшенетін міндеттер екенін жеткізді.
– Әрбір ауылдық округ әкімінің жұмысы партия бағдарламасында белгіленген міндеттермен тікелей сабақтас болуы тиіс. Халыққа берілген әрбір уәде міндетті түрде орындалуы қажет. Бүгінде ауыл-аймақтарда әлеуметтік мәселелер, инфрақұрылым және ауызсу мәселесі өзекті болып отыр. Осы бағытта ауыл әкімдері жергілікті атқарушы органдармен тығыз байланыста, үйлесімді жұмыс істеуі тиіс. Елге берген уәденің үдесінен шығу – басты міндет, – деді Алтынсары Дүйсенбекұлы.
Бұдан кейін филиал төрағасы ауыл округтері әкімдерінің есептерін тыңдап, көтерілген мәселелер бойынша нақты ұсыныстарын білдірді.
Манкент ауылдық округінің әкімі Хикмат Ирисметов жыл басынан бері атқарылған жұмыстар туралы баяндады. Манкент және Аққала елді мекендерін қамтитын ауылдық округте 35 мыңнан астам тұрғын бар. Халықтың басым бөлігі ауыл шаруашылығы өнімдерін өндірумен, сауда-саттықпен және кәсіпкерлікпен айналысады. Қазір округ аумағында 31 ірі және шағын мал бордақылау фермасында 14 400 бас ірі қара бордақылануда. Биыл округ фермерлері 3 800 тоннадан астам ет өнімін Шымкент, Алматы, Астана қалаларына және еліміздің өзге өңірлеріне жөнелткен. Сонымен қатар округ әкімі тұрғындарды толғандырып отырған басты мәселенің бірі тұрғын үй екенін атап өтті. Бүгінде тұрғын үй кезегіне 7 500 азамат өтініш берген.
Ал Қарасу ауылдық округінің әкімі Абдиманат Бурбеков сайлауалды бағдарламасы аясында жүзеге асырылып жатқан жұмыстарға тоқталды. Қарасу ауылдық округіне қарасты 8 елді мекенде 26 860 тұрғын тұрады. Округтің жалпы жер көлемі 10 560 гектарды құрайды. «Ауыл аманаты» бағдарламасы аясында Қарасу ауылдық округінен СПК «Аят-Агро» кооперативі 2,5 пайыздық жеңілдетілген мөлшерлемемен 29,5 млн теңге несие алып, нәтижесінде 42 адам қосымша жұмыспен қамтылған. Халқы тығыз орналасқан округ тұрғындарының басты мәселесі – ағын су тапшылығы екені айтылды. Алтынсары Дүйсенбекұлы бұл мәселені шешу жолдарын бірлесе қарастырып, жүйелі жұмыс жүргізу қажетін атап өтті.
Кездесу барысында жуырда сайланған Ақсукент ауылдық округінің әкімі Мұрат Оразбаевтың алдағы қызметіне сәттілік тілеп, бірлесіп жұмыс істеуге дайын екенін жеткізді. Сонымен қатар жастар кәсіпкерлігін дамытуға және еңбек адамының беделін арттыруға бағытталған жұмыстарды күшейтуді тапсырды.
Барлық ауыл округі әкімдерінің баяндамаларын тыңдаған облыстық партия филиалының төрағасы бірқатар мәселеге сындарлы баға беріп, кемшіліктерді ашық атап өтті. Әлеуметтік мәселелерді шешуде партиялық бақылау тетіктерін тиімді пайдалану жөнінде нақты тапсырмалар жүктеді.
Сонымен бірге партия атынан сайланған аудандық мәслихат депутаттарына сайлауалды бағдарламада көзделген міндеттердің орындалуына белсенді атсалысуды, тұрғындардың мәселесін жүйелі түрде тыңдауды және аудандық партия филиалымен тығыз өзара іс-қимыл орнатуды тапсырды.
Жиын «AMANAT» партиясының жергілікті жерлердегі жұмысының ашықтығын, есептілік пен жауапкершілік қағидаттарын тағы бір мәрте айқындады. Партия үшін басты мақсат халықтың тұрмыс сапасын арттыру, ал сайлауалды бағдарлама осы мақсатқа жеткізетін нақты Жол картасы екені баса айтылды.
Елнар ЕЛТАЙ