Елбасы – Nur Otan партиясының Төрағасы Н.Назарбаевтың тапсырмасына сәйкес, партияның «Кедергісіз келешек», «Бақытты отбасы» және «Ардагерлерді ардақтайық» жобалары аясында 18 наурыз күні республикалық «Біз біргеміз!» акциясы басталған. Акция аясында қажет жандарға антисептикалық құралдар, медициналық маскалар мен коронавирус пандемиясына қарсы қолданылатын бірінші қажеттілік санатына кіретін заттар үлестіріледі. Атаулы көмекті алатындардың қатарында Ұлы Отан соғысы ардагерлері мен жалғызбасты қарт кісілер, аз қамтылған көпбалалы отбасылар, сондай-ақ ерекше жағдайдағы адамдар бар. Гигиеналық құралдардың ішінде стационарлық антисептик, қалта антисептигі, антибактериалдық сабын мен медициналық маска кіреді. Бұл жұмысты атқару кезең-кезеңімен іске асырылады.
– Бүгін әлеуметтік осал топқа жататын Ұлы Отан соғысы ардагерлері, аз қамтылған және көпбалалы отбасылар мен мұмкіндігі шектеулі жандардың алғашқы легіне барып, жағдайларын білдік. Акция шеңберінде 7 мыңнан астам отбасын қамтимыз деген ойымыз бар. Акция «Біз біргеміз!» деп аталады. Мұның әрқайсысында арнайы гигиеналық жиынтықтар, оның ішінде антисептик, 50 маска, шаруашылық сабын, антибактериалдық сабын, сондай-ақ азық-түлік себеті бар. Біз карантин соңына дейін алматылық мұқтаж отбасыларды осындай заттармен қамтамасыз етіп отырамыз. Бұл отбасыларға партия тарапынан көп жылдан бері үнемі көмек беріліп келеді, – деді Nur Otan партиясының Jas Otan жастар қанатының Алматы қаласы бойынша төрағасы Мәди Ахметов.Ол сондай-ақ еріктілердің мұқтаж жандарға көмектесуге әрқашан дайын екенін және осы істі атқаруға арнайы қорғаныс костюмін киіп, маска тағып барғанын айтты. Барлық гуманитарлық көмек тікелей байланыссыз әдіспен үлестіріледі. Бұл акцияға 30 волонтер тартылған. Олар арнайы кесте бойынша 10 адамнан бөлініп жұмыс істейді.
Гүлнар ТӘЖИЕВА