Иранда өмір сүру құнының күрт өсуіне қарсы наразылықтар бесінші күн қатарынан жалғасып жатыр, – деп хабарлайды Aikyn.kz сайты www.bbc.com сайтына сілтеме жасап.
Бұл оқиғалар барысында кем дегенде алты адам қаза тапты.
Fars ақпарат агенттігі мен Hengaw құқық қорғау ұйымының хабарлауынша, наразылық білдірушілер мен полиция арасындағы қақтығыстар кезінде елдің оңтүстік-батысындағы Лордеган қаласында екі адам көз жұмған. Тағы үш адам Азна қаласында, ал бір адам елдің батысындағы Кухдашта қаза тапқан.
Бейсенбі күні әлеуметтік желілерде тәртіпсіздіктер кезінде өртеніп жатқан көліктердің видеолары пайда болды.
Көптеген наразылық білдіруші елдің Жоғарғы көшбасшысының билігін тоқтатуға шақырса, кейбіреулері монархияны қайтаруды ұсынып отыр
1 қаңтар күні елдің әртүрлі өңірлерінде валюта бағамының құлдырауына байланысты тәртіпсіздіктер болғаны туралы хабарламалар түсті.
BBC Persian қызметі растаған бейнежазбалар Лордеган қаласында, ел астанасы Тегеранда және оңтүстіктегі Фарс провинциясындағы Марвдашта қаласында бейсенбі күні өткен наразылықтарды көрсетеді.
Fars агенттігіне сілтеме жасаған шенеунік Лордеганда екі адамның қаза тапқанын хабарлағанымен, олардың наразылық білдірушілер ме, әлде қауіпсіздік күштерінің қызметкерлері ме екені нақты айтылмаған. Сол сияқты, көршілес Лурестан провинциясындағы Азна қаласында үш адамның қаза тапқаны жайлы айтылып, олардың кім екені нақты көрсетілмеген.
Ал Hengaw құқық қорғау ұйымы Лордеганда қаза тапқан екі адамның наразылық білдірушілер екенін айтып, оларды Ахмад Жалил және Саджад Валаманеш деп таныды.