Басқосуға «AMANAT» партиясы Шымкент қалалық филиалының төрағасы Мұрат Жолдыхожаев, қалалық партия филиалы атқарушы хатшысының орынбасарлары Ербол Байқонысов пен Талғат Балтабаев, сондай-ақ фракция мүшелері қатысты. Бірқатар мәслихат депутаты жиынға онлайн форматта қосылды.
Отырыстың күн тәртібіне сәйкес фракция жетекшісін сайлау мәселесі қаралды. Бұл бойынша сөз алған Мұрат Жолдыхожаев фракцияның жаңа жетекшісі ретінде Талғат Балтабаевтың кандидатурасын ұсынды. Ұсыныс фракция мүшелері тарапынан бірауыздан қолдау тауып, ашық дауыс беру арқылы қабылданды.
Мұрат Жолдыхожаев өз сөзінде бұл шешімнің партияның орталық аппаратымен келісіліп, жан-жақты сараланғанын атап өтті.
«Фракция жұмысы – партия саясатын жергілікті деңгейде нақты іске асыратын маңызды алаң. Сондықтан жетекшінің тәжірибесі мен жауапкершілігі шешуші рөл атқарады. Талғат Балтабаевтың бұл міндетті абыроймен атқаратынына сеніміміз мол. Алдағы жұмысына сәттілік тілеймін», – деді ол.
Өз кезегінде фракцияның жаңа жетекшісі Талғат Балтабаев көрсетілген сенім үшін партия басшылығына және әріптестеріне алғысын білдірді.
«Бұған дейін фракция жетекшісінің орынбасары ретінде жинаған тәжірибемді енді жаңа қызметте толық пайдалануға дайынмын. Алдымызда тұрған басты міндет – сайлауалды бағдарламаның орындалуын қатаң бақылау, тұрғындардың мәселесін дер кезінде көтеріп, нақты шешімдерге қол жеткізу», – деді Талғат Балтабаев.
Сондай-ақ жиын барысында «AMANAT» партиясы Шымкент қалалық филиалының төрағасы Мұрат Жолдыхожаев мәслихат депутаты, фракция мүшесі Алия Юсупованы партия Төрағасы Ерлан Қошановтың атынан «Белсенді қызметі үшін» төсбелгісімен марапаттады. Бұл марапат депутаттың қоғамдық-саяси қызметтегі белсенділігі мен партия жұмысына қосқан үлесі үшін табысталды.
Фракция отырысында алдағы кезеңге арналған жұмыс басымдықтары мен партиялық бақылауды күшейту мәселелері де назарға алынды.
Елнар ЕЛТАЙ