Жиын барысында қатысушылар Қазақстан Республикасы жаңа Конституциясы жобасының негізгі ережелерін талқылап, экологиялық күн тәртібінің маңыздылығын және қоршаған ортаны қорғау ісінде қоғам мен мемлекеттің жауапкершілігін күшейту қажеттігін атап өтті.
Сондай-ақ 2026 жылға арналған кеңестің іс-шаралар жоспары бекітілді. Аталған жоспар өңірдегі экологиялық бастамаларды одан әрі дамытуға, халықтың экологиялық мәдениетін арттыруға және табиғатты қорғау жобаларын қолдауға бағытталған.
Кеңес мүшелері «AMANAT» партиясының Сайлауалды бағдарламасын іске асыру жөніндегі Жол картасының Павлодар облысы бойынша орындалу қорытындыларына ерекше назар аударды. Бірқатар іс-шараның сәтті жүзеге асырылғаны атап өтілді. Атап айтқанда, өнеркәсіптік кәсіпорындардың санитарлық-қорғау аймақтары аумағында және жасыл белдеулерге бөлінген учаскелерде 40 мың жасыл желек отырғызу жөніндегі тармақ толық орындалды. Ертіс және Сілеті өзендерінің арналарын тазарту жұмыстары жүргізіліп, бұл гидрологиялық режимнің жақсаруына ықпал етті. Сонымен қатар облыс қалаларында қалдықтарды фракциялар бойынша – құрғақ және ылғалды – бөлек жинауға арналған 2 мыңға жуық контейнер орнатылды.
Сонымен бірге бірқатар міндет бақылауда қалып отыр. Облыстың барлық аудан орталықтарында сұрыптау желілері бар қатты тұрмыстық қалдықтар полигондарын салу бойынша жобалау-сметалық құжаттаманы әзірлеу жұмыстары жүргізілуде. Сондай-ақ мемлекеттік орман қоры аумағында 12 мың орман көшетін отырғызу жұмыстары жалғасуда.
Отырыс қорытындысы бойынша экологиялық міндеттемелерді дәйекті түрде орындаудың және өңірдегі экологиялық ахуалды жақсарту мақсатында мемлекеттік органдардың, партияның және жұртшылықтың күш-жігерін одан әрі шоғырландырудың маңыздылығы атап өтілді.
Елнар ЕЛТАЙ