Еліміздің барлық аумағын қамтыған іс-шара барысында көші-қон заңнамасын бұзудың 7 мыңнан астам дерегі тіркелді. Соның ішінде 4,1 мың шетел азаматы елімізде болу қағидаларын бұзғаны үшін әкімшілік жауапкершілікке тартылса, 2,7 мың шетел азаматының заңсыз жұмыс істегені анықталған. Одан бөлек, 2,2 мың отандасымыз бен заңды тұлғаның шетелдіктер туралы ақпаратты жасырып, дер кезінде полицияны хабардар етпегені анықталды. Тиісінше, олар да жауапкершілікке тартылды. Сондай-ақ 500-ден астам жұмыс беруші шетелдік жұмыс күшін заңсыз пайдаланғаны үшін жауапкершілікке тартылды. Жедел іс-шара барысында осындай заңбұзушылықтарға байланысты жалпы сомасы 200 млн теңгеден астам айыппұл салынды.
1,5 мың шетел азаматының елде болуы мерзімі қысқартылса, 1,2 мың шетелдікті елден шығару туралы сот шешімі шықты. 212 шетел азаматы депортацияланды. Олардың 8-і деструктивті-радикал діни ағым өкілі екені анықталған. Елден шығарылған шетелдіктердің барлығы 5 жыл бойы Қазақстан аумағына кіре алмайды. Одан бөлек, ел шекарасын бұзғаны үшін – 9, заңсыз көші-қон ұйымдастырғаны үшін – 9, шетелдік жұмыс күшін тарту қағидаларын бұзғаны үшін 6 қылмыстық іс қозғалған. Мұның барлығы қоғамдық тәртіпті сақтау мен қылмыстың алдын алуға, «Заң мен тәртіп» қағидаларын қатаң сақтауға бағытталып отыр.
Арда БЕКЖАН