Танымал продюсер Баян Алагөзова Qazaq Ordasy YouTube арнасына берген сұхбатында кейбір жұлдыздардың дінге қатысты әрекеттерін сынға алды, – деп хабарлайды Aikyn.kz сайты.
Оның айтуынша, кейбір танымал тұлғалар Меккеге сапарын ашық жариялап, қасиетті орында түсірілген суреттерін әлеуметтік желіде белсенді бөліседі.
«Жария түрде Меккеге барып, бәрін көрсету – мәдениетсіздік. Ал кейін елге оралған соң бұрынғыдай қыдырып, ішімдік ішуді жалғастырады. Бұл – екіжүзділік. Мұны біреу айтуы керек», – деді ол.
Сондай-ақ продюсер әріптестеріне үндеу жасап, қасиетті орынға бармас бұрын өз іс-әрекеттеріне жауапкершілікпен қарауға шақырды.
«Егер Меккеге баратын болсаңыздар, мұның мәнін терең түсініп, ойланып барған жөн. Қайтып келген соң бәрі бұрынғы қалпына келетін болса, онда оның қажеті қанша?» – деді Баян Алагөзова.