Іс-шара «Таңшолпан: әйелдер кадрлық резерві – нәтижелер мен перспективалар» бағдарламасы аясында ұйымдастырылып, жоба қорытындысын шығаруға, сондай-ақ ондағы түлектердің алдағы мүмкіндіктерін талқылауға арналды. Салтанатты жиынға «AMANAT» партиясының өкілдері, депутаттар, сарапшылар және қоғам қайраткерлері қатысты.
Байыпты басқосу барысында Мәжіліс депутаты, «AMANAT» партиясы фракциясының мүшесі Екатерина Смышляева, «AMANAT» партиясы Қостанай облыстық филиалының төрағасы Алмат Досмұхамедов, «AMANAT» партиясы Қостанай аудандық филиалының төрағасы, жоба жетекшісі, аудандық мәслихат депутаты Марина Растегаева, сондай-ақ партияның Орталық аппараты мен қоғамдық ұйымдардың өкілдері сөз сөйледі. Іс-шара модераторы – «AMANAT» партиясы Қостанай облыстық филиалы жанындағы Әйелдер қанатының жетекшісі Гүлсара Жаманқұлова.
Өз кезегінде, депутат Екатерина Смышляева бұл жоба «AMANAT» партиясының белсенді әйелдермен жүргізіп отырған жүйелі жұмысының бір бөлігі екенін атап өтті. Оның айтуынша, қыз-келіншектер барлық деңгейдегі мәслихаттар мен Мәжілісте еселі еңбек етіп келеді. Ал әкімдерді сайлау жүйесі енгізілгеннен кейін, олар осы лауазымдарға сайлауға түсіп, отбасыларды толғандырған мәселелерді терең түсінуі және эмпатиясы арқылы сайлаушылардың сеніміне ие болуда.
Ол партияның Әйелдер қанаты бүгінде қыз-келіншектерді еліміздің саяси өміріне дайындауға басымдық беріп отырғанын атап өтті. Бұл бағыт коммуникация дағдыларын, құқықтық сауаттылықты және саяси технологияларды үйрету қадамдарын қамтиды. Жұмыс саяси көшбасшылықтан бастап, ауылдағы қыз-келіншектерді қолдауға, психологиялық көмек көрсетуге және цифрландыруға дейінгі бірнеше бағыт бойынша жүргізілуде.
«Бүгінде «AMANAT» партиясы әйелдерді саяси процестердің болашақ қатысушылары ретінде дамытып келеді. Әйелдер биліктің барлық деңгейінде ұсынылуға тиіс деп санаймыз. Бұл қадам олардың тек өз мүдделерін қорғауы үшін ғана емес, сонымен қатар жеке тәжірибесі арқылы әлеуметтік маңызы бар мәселелерді көтеруі үшін де қажет», – деді Екатерина Смышляева.
Осы орайда «AMANAT» партиясы Қостанай облыстық филиалының төрағасы Алмат Досмұхамедов гендерлік саясат пен отбасы мәртебесі мемлекеттің негізгі басымдықтарының бірі екенін атап өтті. Ол әйелдердің қоғамдық институттарды нығайтуға және еліміздің экономикалық дамуына қосқан үлесіне ерекше тоқталды.
«Әйелдің қоғамдағы мәртебесі мен рөлін арттыру, олардың тұлға ретінде дамуына жағдай жасау – «AMANAT» партиясының негізгі міндеттерінің бірі. Партия әйелдер көшбасшылығын дамыту ісіне белсенді түрде қолдау көрсетеді», – деді Алмат Досмұхамедов.
Бұл ретте, Гүлсара Жаманқұлова аталған жоба республика аумағында алғашқылардың бірі болып Қостанай облысында жүзеге асырылғанын атап өтіп, партияның екі мың адамды құрайтын кадрлық резерв қалыптастыру жөніндегі ауқымды бастамасы аясында жүз түлек даярланғанын жеткізді. Оның айтуынша, оқу барысы үш кезеңнен тұрды. Соның ішінде, дебаттар мен жеке даму стратегияларын қорғау кезеңдері бар. Әр қатысушы әкім, депутат немесе қоғамдық көшбасшы ретіндегі болашақ қызметіне қатысты өз көзқарасын қалыптастырды.
«Бүгін алғашқы жүз түлегіміз оқуын аяқтады. Бұл біз үшін өте маңызды. Менің ойымша, бұл тек саяси өмірді ғана емес, жалпы көшбасшылықты таңдаған әйелдер үшін қоғамға пайдалы болуға берілген жарқын мүмкіндік», – деді Гүлсара Жаманқұлова.
Өз кезегінде, Марина Растегаева «Таңшолпан» жобасының бір жылдық жұмысын қорытындылап, бұл бастама өңірдің саяси сахнасында жаңа есімдердің пайда болуына серпін беретінін атап өтті. Осы уақыт аралығында жүз қатысушы мемлекеттік басқару мен бюджеттік саясат бағыты бойынша білім алып, өздерінің сайлауалды бағдарламаларын қорғады. Оның айтуынша, барлық түлек кадрлық резервке енгізілді. Енді олар депутаттық корпусқа және әкім лауазымына үміткер болуға дайын.
«Бұл – қыз-келіншектердің шешім қабылдау деңгейіндегі өкілдігін арттыруға бағытталған ортақ ұмтылысымыз. Саясат саласында теңдік қағидаты мінсіз сақталып, «әйелдер квотасы» ұғымы өткеннің еншісінде қалуы керек. Оның орнына әйелдердің таланты мен еңбегі мойындалуға тиіс», – деді Марина Растегаева.
Спикерлер «Таңшолпан» жобасы әйел-көшбасшыларды даярлаудың тиімді құралы екенін атап өтіп, қатысушылардың дайындық деңгейін, олардың белсенді азаматтық ұстанымы мен қоғамдық-саяси өмірге атсалысуға дайындығын жоғары бағалады.
Іс-шара аясында жобаға қатысушыларға сертификаттар табысталды. Әр қыз-келіншек конкурстық іріктеуден өтіп, білім беру модульдері, тренингтер, дебаттар және өз бастамаларын қорғау бойынша оқу бағдарламасына қатысты.
«Таңшолпан» жобасына Қостанай облысының түкпір-түкпірінен келген 100 әйел қатысып, белсенді әрі бастамашыл қыз-келіншектер қауымдастығы қалыптасты. Алған білімдері мен дағдылары олардың кәсіби және қоғамдық тұрғыда дамуына жол ашады.
Тілек ҚАБЫЛ