Денсаулық сақтау министрлігінің баспасөз қызметінің мәліметінше, Қазақстанның денсаулық сақтау жүйесінде пациенттерге күтім көрсетіп, саланың тұрақты жұмысын қамтамасыз етіп отырған 145 мыңнан астам маман кәсіби мерекесін атап өтуде, – деп хабарлайды Aikyn.kz.
Мейіргерлер — медицина қызметкерлерінің ең көп санаттағы тобы. Олар пациентті алғашқы қабылдаудан бастап емдеу мен оңалтуға дейінгі барлық кезеңде сүйемелдеп, медициналық көмектің сапасы мен үздіксіздігін қамтамасыз етеді.
Бүгінде елдің денсаулық сақтау жүйесінде орта буынның 188 мыңнан астам медицина қызметкері еңбек етеді, олардың 145 мыңнан астамы — мейіргер.
50 мыңнан астам маман ауылдық жерлерде, ал шамамен 65 мыңы медициналық-санитариялық алғашқы көмек көрсету деңгейінде жұмыс істейді.
Қазақстанда медициналық-санитариялық алғашқы көмек деңгейінде кеңейтілген мейіргерлік тәжірибе белсенді дамып келеді.
Мейіргерлер созылмалы аурулары бар пациенттерді жүргізуге, профилактикаға, динамикалық бақылауға және консультация беруге қатысып, алғашқы көмектің қолжетімділігі мен тиімділігін арттыруға үлес қосуда.
Кадр даярлауды 94 медициналық колледж жүзеге асырады, оның ішінде мейіргер ісі бойынша қолданбалы бакалавриат бағдарламаларын іске асыратын 42 жоғары медициналық колледж бар. Қазіргі таңда колледждерде 109 мыңнан астам студент білім алуда.
Қазақстанда — кіші мейіргерден бастап «бакалавриат – магистратура – докторантура» бағдарламаларына дейін мейіргер ісі мамандарын даярлаудың көпдеңгейлі жүйесі қалыптасқан.
Мейіргерлердің еңбегі медициналық көмектің сапасын арттыру мен халық денсаулығын сақтаудың негізгі факторларының бірі болып қала береді.
Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.