Жаңа саябақ Майқұдық пен Оңтүстік-Шығыс шағынаудандарының арасында орналасады. Экосаябаққа 200 гектар жер бөлінген. Жобаның бастамасы ретінде ағаш егу жұмыстары қолға алынды.
«Таза Қазақстан» республикалық бағдарламасы аясында мың түп ағаш – емен, алма, қарағай және қарағаш көшеттері егіліп, болашақ саябақтың іргетасына символикалық тас қойылды.
Ауқымды іс-шараға жастар, еріктілер, қоғам белсенділері мен депутаттар қатысты.
Қарағанды облысының әкімі Ермағанбет Бөлекпаев мұндай жобалардың қала тұрғындарының өмір сапасына тікелей әсер ететінін атап өтті.
– Біз Қарағандыда жаңа экосаябақ ашып жатырмыз. Бұл – өте жақсы бастама. Аумағы кең, маңайда жаңа шағынаудан мен спорттық кластер салынып жатыр. Мемлекет басшысы Қасым-Жомарт Тоқаев табиғатқа ұқыпты қарау әр тұрғынның күнделікті мәдениетінің бір бөлігіне айналуы тиіс екенін бірнеше рет айтқан болатын. Бүгінде бұл қағидалар ел бойынша мыңдаған адамды біріктірген «Таза Қазақстан» бағдарламасы аясында жүзеге асырылып келеді. Экосаябақ – енді жай ғана демалыс орны емес, экология мен адамдардың өмір сапасына әсер ететін заманауи қалалық ортаның бір бөлігі. Әрбір жаңа ағаш – таза ауа мен Қарағандының болашағына қосылған үлес. Жайлы әрі таза қала әр адамның өз ауласына, көшесіне және қоршаған ортаға деген ілтипатынан басталады. Тұрғындар мен бизнесті көгалдандыру жұмыстарына белсенді қатысуға шақырамын, – деп атап өтті Ермағанбет Бөлекпаев.
Қарағанды тұрғыны Магомед Зауров бала кезінен болашақ экосаябақ аумағындағы көлдердің маңында уақыт өткізгенін айтты.
Тұрғындар мен бизнесті көгалдандыру жұмыстарына белсенді қатысуға шақырамын. Мен үшін Қарағанды – Қазақстандағы ең үздік қала. Біз осы жерде шомылып, балық аулайтынбыз. Енді бұл жер бұрынғыдан да көркейіп, егілген барлық ағаш тамыр жайып, қала тұрғындары мен қонақтарын қуантса екен деймін, – деді ол.
Ерікті Жанарай Санақбайдың айтуынша, жастар экологиялық бастамаларды белсенді қолдайды.
– Мен жеті жылдан бері волонтерлікпен айналысып келемін. Біз экологиялық акциялар мен ағаш егу шараларына үнемі қатысамыз. Осындай саябақтың ашылуы – қаланың болашағы мен жастар үшін тамаша идея, – дейді ол.
Экосаябақ құрылысы Қарағандының жаңа ауданын дамыту жобасының бір бөлігіне айналады. Қазірдің өзінде Оңтүстік-Шығыс пен Майқұдықты байланыстыратын айналма жол салынып жатыр.
Алдағы уақытта мұнда серуендеуге арналған аллеялар, спорт алаңдары, веложолдар және барлық жастағы тұрғындарға арналған демалыс аймақтары пайда болады.
Саябақ аумағында коммерциялық нысандар салу жоспарланбаған. Оны серуендеуге, отбасылық демалысқа және таза ауада спортпен айналысуға арналған орын ретінде сақтау көзделіп отыр.
Сонымен қатар бұл аумақта көлемі 72 гектар болатын ірі спорттық кластер құру жоспарланған.
Жоба аясында әмбебап арена, Мұз сарайы, жеңіл атлетика манежі, 12 мың көрерменге арналған UEFA санатындағы стадион салынып, Футбол академиясының құрылысы басталып кетті.
Айта кету керек, былтыр Майқұдық пен Оңтүстік-Шығыс шағынаудандарын байланыстыратын заманауи талаптарға сай магистраль салынған болатын. Жергілікті тұрғындар мен белсенділер жол құрылысының сапасына жоғары баға беріп, «жол Еуропадағыдай әдемі» деп ризашылықтарын білдірді.
Жаңа жолдың жалпы ұзындығы 5,9 шақырымды құрайды. Ол Мұқанов пен Тәттімбет көшелерінің қиылысынан басталып, Көгілдір тоғандар ауданындағы Шығыс айналма трассасына дейін созылады.
Бұл жоба қаланың орталық көшелеріндегі көлік жүктемесін азайтып, қозғалыс уақытын қысқартуға мүмкіндік береді.
Әдебиет БЕЛГІБАЙҰЛЫ,
Қарағанды облысы