Алматы тұрғыны, әлеуметтік желіде Лёля Берг есімімен танымал Элеонора бала кезінде жыныстық зорлық-зомбылық көргенін мәлімдеп, қоғамда қызу талқылау тудырды, – деп хабарлайды Aikyn.kz сайты.
Оның айтуынша, оқиға 6-9 жас аралығында болған. Әкесі өзінің зорлағанын жасыру үшін қызының өзін де, туған-туыстарды да қорқытқан екен.
Бойжеткен әлеуметтік желіде әкесімен болған әңгіменің видеосын жариялап, ұзақ жылдар бойы бұл туралы үнсіз келуге мәжбүр болғанын айтты. Элеонораның сөзінше, ол бала кезінде қорқыту мен қысымның салдарынан болған жағдайды ешкімге жеткізе алмаған.
Жарияланған видеода Элеонора әкесінен түсініктеме талап етеді. Бірақ ер адам тағылған айыптарды жоққа шығарып, қызының мәлімдемесін мойындамаған.
Элеонора бұған дейін аталған дерек бойынша тергеу жүргізілгенін, алайда дәлелдердің жеткіліксіздігіне байланысты іс тоқтатылғанын айтты. Қазіргі уақытта құқық қорғау органдары материалдарды қайта қарап жатқаны хабарланды.
Бойжеткеннің айтуынша, алдағы уақытта ол бірқатар сараптамадан және заңдық рәсімдерден өтеді. Полиция әзірге бұл жағдайға қатысты ресми түсініктеме берген жоқ.
Бұл оқиға қоғамда балаларға қатысты зорлық-зомбылықтың алдын алу, мұндай фактілерді дер кезінде анықтау және зардап шеккен жандарға қолдау көрсету мәселелерін қайта көтерді. Мамандардың айтуынша, балалардың қауіпсіздігін қамтамасыз ету үшін олардың шағымдарына мұқият қарап, психологиялық және құқықтық көмекке қолжетімділікті арттыру маңызды.
Қазіргі таңда аталған жағдай бойынша ресми тергеу әрекеттерінің нәтижесі күтілуде. Сондықтан оқиғаға қатысты түпкілікті құқықтық бағаны құзырлы органдар береді.