Астана іргесіндегі Талапкер ауылында өткен бәйге кезінде 3 жасар баланы ат таптап кетіп, ол ауыр жарақатпен жансақтау бөліміне түсті, – деп хабарлайды Aikyn.kz сайты КТК арнасына сілтеме жасап.
Баланың анасы Салтанат Ибраева бұл оқиға кезінде ұлы үйдің маңында 8 жастағы әпкесімен ойнап жүргенін айтты.
Айтуынша, сол сәтте көшеде ұйымдастырылған бәйге аттардың бірі баланы қағып кеткен. Салдарынан баланың басы жарақаттанып, қолы сынған. Сондай-ақ ішкі ағзасы зақымданған.
"Балаға бірнеше ота жасалған. Бұған кінәлі адам заң алдында жауап беруі керек. Күдікті осы уақытқа дейін кешірім де сұрамады", – дейді Салтанат Ибраева.
Полиция бұл дерек бойынша қылмыстық іс қозғалғанын хабарлады. Қазір тергеу жүргізіліп жатыр. Күдіктіге елден шықпау туралы бұлтартпау шарасы қолданылған.