Бейкүнә бүлдіршінді іздестіру жұмыстары үш тәулікке созылды. Балғын ғұмырдың аман табылуына алаңдаған тұрғындар іздеу шараларына белсенді қатысты. Құзырлы органдар тарапынан да жұмыстар жедел ұйымдастырылып, 495 адам, 17 техника, 3 қайық және 3 кинологиялық топ жұмылдырылды.
Өкінішке қарай, елді елеңдеткен жағдай ел күткендей жақсы нәтиже көрсетпеді. Бүлдіршіннің денесі жоғалған жерден шамамен 30 шақырым төмен орналасқан «Әйтек» су торабы маңынан табылды. Бұл жағдай дария мен су арналары маңындағы қауіпсіздік жүйесінде әлі де шешімін таппаған түйткілдердің бар екенін көрсетті. Әсіресе, тұрғын үйлерге жақын орналасқан қауіпті аймақтарда бақылау мен қорғаныс шараларының жеткіліксіздігі байқалды. Кейбір жерлерде бейнебақылау камералары мүлде орнатылмаған немесе олардың саны жеткіліксіз.
Жалпы, мұндай жағдай өңірде алғаш рет болып отырған жоқ. Жыл сайын Сырдария мен түрлі су арналары адам өміріне қауіп төндіріп келеді. Биылдың өзінде бірнеше адамның суға кету фактісі тіркелген.
Дегенмен су қауіпсіздігі мәселесі мүлде назардан тыс қалып отыр деуге болмайды. Облыс аумағында 19 ірі канал, 220 шағын канал және 207 көл бар. Мамандар жүргізген зерделеу нәтижесінде 63 қауіпті учаске анықталып, оларға ескерту белгілері мен билбордтар орнатылған.
Облыстық төтенше жағдайлар департаментінің дерегінше, өңірде әр шомылу маусымы қарсаңында профилактикалық жұмыстар күшейтіледі. Алайда қайғылы оқиғалардың жалғасуы қолданыстағы шаралардың жеткіліксіз екенін аңғартады. Себебі мәселе тек ескерту белгілерін орнатумен немесе рейдтер өткізумен шешілмей тұр.
Негізінен, қала тұрғындары тарапынан қауіпсіз әрі қолжетімді жағажайлардың тапшылығы туралы мәселе жыл сайын көтеріліп келеді. Бұл тұрғыда Қызылорда қалалық дене тәрбиесі, спорт және туризм бөлімінің мәліметінше, бүгінде қала аумағында рұқсат етілген 15 демалыс орны жұмыс істейді. Сонымен қатар тұрғындардың бірнеше жылдан бергі басты сұранысына айналған Тасбөгет кентіндегі «Эдельвейс» жағажайын іске қосу жұмыстары жүргізілуде.
Алайда жүргізілген зерделеу нәтижесінде төтенше жағдайлар қызметінің мамандары жағажайдың суға түсу маусымына толық дайын еместігін анықтаған. Қазір анықталған кемшіліктерді жою жұмыстары жүргізілуде. Сонымен қатар «Сыр самалы» жағажайын реконструкциялау және Көксу аймағын жағажай талаптарына сәйкес заңдастыру бағытындағы жұмыстар да қолға алынған.
«ҚР Экология департаментінің келісімі, Арал-Сырдария бассейндік инспекциясының рұқсаты және «Су объектілері мен су шаруашылығы құрылысындағы көпшіліктің демалуына, туризм мен спортқа арналған жерлерді белгілеу туралы» қаулыға сәйкес, жағажайға зерделеу жұмыстары жүргізілді. Нақты айтқанда, жоғарыда аталған қаулы негізінде 1 маусым күні Қызылорда облысының табиғи ресурстар және табиғат пайдалануды реттеу басқармасы төтенше жағдайлар департаментінің жедел құтқару жасағы мамандарымен «Эдельвейс» жағажайының суға түсу маусымына дайындық деңгейіне зерделеу жүргізді. Зерделеу нәтижесінде төтенше жағдайлар департаментінің жедел құтқару жасағы мамандары тарапынан жағажай суға түсу маусымына дайын еместігі жайлы акт толтырылды. Қазір аталған акт ескертпелерін жою жұмыстары жүргізілуде. Сонымен қатар «Сыр самалы» жағажайына реконструкция жұмыстарын жүргізу, ашық су айдыны Көксу аймағын жағажай талаптарына сай заңдастыру шаралары қарқын алды», – дейді бөлім тарапынан.
Сондықтан қауіпсіз жағажайлар ашумен қатар, ашық су арналарының қауіпсіздігін қамтамасыз ету мәселесіне де басымдық берілуі қажет. Атап айтқанда, қауіпті аймақтарды қоршау, бейнебақылау жүйелерін орнату, жарықтандыруды күшейту, ескерту белгілерін көбейту және құтқару қызметтерінің жұмысын жетілдіру маңызды.
Ербақыт ЖАЛҒАСБАЙ,
Қызылорда облысы