Украиналық дрондар Краснодар өлкесінен Қырымға әскери техника мен қару-жарақ тасымалдауға пайдаланылған ресейлік «Панагия» паромына шабуыл жасады.
Кеме Ресей техникасы мен жүктерін Қырым түбегіне жеткізу үшін қолданылған. Әсіресе Қырым көпірі арқылы жүк көліктерінің қозғалысына шектеу қойылғаннан кейін бұл паром балама бағыттардың біріне айналған. Ресей тарапы да паромның Қырымдағы әскерді жабдықтауға арналған балама маршруттардың бірі ретінде пайдаланылғанын мойындап отыр. Оның ішінде әскери жүктерді тасымалдау да болған.
21 маусымнан бастап өткел жұмысы тоқтатылды. Алдағы уақытта көлік ағындары Ростов-на-Дону, Таганрог, Мариуполь, Мелитополь және Симферополь арқылы өтетін Р-280 құрлық бағытына ауыстырылуы тиіс.
Шектеулердің ресми себебі ретінде қауіпсіздік тәуекелдері, соның ішінде жаңа шабуылдар мен диверсия қаупі аталып отыр.