Үкімет 2026 жылғы 26 маусымдағы № 556 қаулысымен Мемлекеттік ту, Мемлекеттік елтаңба және олардың бейнелерін, сондай-ақ Мемлекеттік әнұран мәтінін пайдалану ережелеріне өзгерістер енгізді, – деп хабарлайды Aikyn.kz.
Жаңартылған қаулыда Мемлекеттік туды пайдалану кезінде сақталуы тиіс негізгі талаптар нақтыланған. Атап айтқанда:
тұрғын үйлерде Ту кемінде 3 метр биіктікте орналастырылуы тиіс;
егер ғимараттың құрылымына байланысты Туды орналастыру мүмкін болмаса, оны ғимаратқа іргелес аумақтағы жеке ту тұғырына орнатуға болады;
Мемлекеттік ту жерге, еденге, суға немесе өзге де заттардың бетіне тимеуі тиіс;
Ту тік ілінген кезде ұлттық өрнек Тудың жоғары бөлігінде орналасуы қажет;
мәдени, спорттық және қоғамдық іс-шараларда Мемлекеттік туды коммерциялық мақсатта пайдалануға тыйым салынады;
Яғни, жеке және заңды тұлғалар патриоттық сезімді білдіру мақсатында Мемлекеттік туды үйлерге, өзге де ғимараттарға, 45 градус бұрышпен балкондарға және салтанатты іс-шаралар өтетін орындарға іле алады.
Сонымен қатар Мемлекеттік ту ұлттық стандартқа толық сәйкес болуы тиіс. Туды зақымданған, өңі кеткен, кірлеген немесе қадір-қасиетін төмендететін өзге де ақаулары бар күйінде пайдалануға тыйым салынады.
Туды жеке және заңды тұлғалардың көлік құралдарының салонында орналастыруға рұқсат етіледі.
– Мемлекеттік ту жарнамалық мақсатта, сондай-ақ киім-кешек, төсек-орын жабдықтары, перде, дастарқан, кілемше және өзге де жабын түрлері ретінде пайдаланылмайды, – делінген құжатта.
Спортшыларға да қатысты өзгерістер енгізілген. Енді Мемлекеттік тудың бейнесін спортшылардың спорттық киімі мен жабдықтарында ресми түрде пайдалануға рұқсат берілді.
Сонымен қатар қаулыда мемлекеттік рәміздерді ресми интернет-ресурстарда, стендтер мен плакаттарда орналастыру тәртібіне қатысты бірыңғай реттілік сақталуы тиіс. Алдымен Мемлекеттік ту, одан кейін Мемлекеттік елтаңба, содан соң Мемлекеттік әнұранның мәтіні орналастырылады. Сондай-ақ стендтерді безендіргенде фон көк түсті, ал жазулар алтын түстес болуы керек.