Қадағалау органы әлеуметтік желілер мониторингі шеңберінде экстремистік, террористік сипаттағы ақпарат, жасөспірімдердің суицидін насихаттау және балаларға қатысты зорлық-зомбылық әрекеттері таратылған топтарды анықтады.
Мысалы, POZOR PETRO Telegram-арнасында кәмелетке толмағандардың ар-намысы мен қадір-қасиетіне нұқсан келтіретін посттар, сондай-ақ сексуалдық сипаттағы бейнероликтер орналастырылған.
«Киберқадағалау» ақпараттық жүйесі арқылы қабылданған шаралардың арқасында аталған топтарға кіру бұғатталған.
Жыл басынан бері облыс прокуратурасы заңсыз контенті бар 205 интернет-ресурсты бұғаттады.
Облыстық прокуратура ата-аналарды кәмелетке толмаған жасөспірімдердің ақпараттық қауіпсіздігіне ерекше назар аударуға, олардың интернет-белсенділігіне қызығушылық танытуға және олар қарайтын контенттерді бақылауға шақырады.
Ата-аналар тарапынан уақытылы назар аудару, интернет желісіндегі қауіпсіз мінез-құлық туралы үнемі әңгімелесу және әлеуметтік желілер мен мессенджерлердің пайдаланылуын бақылау балаларды құқыққа қайшы әрекеттерге тартудың және зиянды мазмұнды таратудың алдын алудың маңызды шаралары болып табылады.
Омар Ұларбекұлы