Ақтөбеге жұмыс сапары барысында Respublica партиясының сайлауалды штабының өкілдері «Молочные истории-А» ЖШС кәсіпорнына барып, сүт өнімдерін өндіру және өңдеу барысымен танысты, - деп хабарлайды Aikyn.kz сайты Respublica партиясының баспасөз қызметіне сілтеме жасап.
Respublica-ның жаңартылған сайлауалды бағдарламасында экономиканы дамыту, отандық өндірісті қолдау және кәсіпкерлікке мүмкіндік беру негізгі бағыттардың бірі ретінде белгіленген. Партияның ұстанымы бойынша, жаңа өндіріс — жаңа жұмыс орындары, ал жаңа жұмыс орындары — халықтың тұрақты табысының негізі. «Бізге дайын байлықты бөлісу ғана емес, жаңа байлық жасау маңызды. Оның негізі - жұмыс істеп тұрған кәсіпорындар, жаңа өндірістер және жаңа жұмыс орындары. Сондықтан отандық өндірушіні қолдау - экономиканы қолдаудың ең нақты жолдарының бірі», - деді Respublica өкілі. Партия өкілдері Ақтөбедегі кәсіпорындармен кездесулерін жалғастырады.