Адамдар демалғанда ауа емес, жалын жұтқандай болады. Дені түзу адамдардың барлығы мұндайда салқын бөлмелерде, жағажайда жатады. Түк таппағандары қалың ағаш көлеңкесінде саялайды.
Осындай ми қайнатарлық ыстықта ұлан жолдың бойында ала таяғын шошаңдатып жол-көлік полициясының қызметкері тұр. Түріне қарасаң, жылағың келеді. Одан «мына аптап ыстықта неге тұрсың?» деп сұрағың келеді. Өйткені өн бойын тер басып кеткен. Қолындағы беторамалы малмаңдай су болыпты. Әлгі жол сақшысы беторамалын сығып қалғанда, бір шелек тер жерге төгіледі.
Әне, ол жүк көлігін тоқтатты. Ауыр жүк көлігінің жүргізушісі Мәдениет институтын тауысқан ба, аса бір мейірмандылықпен мәдениетті жылы жымиып қолын алғанда, жол сақшысының көзі жыпылықтап кетті. Оның бармақтарының арасында бір уыс теңге қалып кеткен еді. Жол сақшысы жүргізушіге бір ауыз тіл қатқан жоқ. Қолын шоқтай қарып бара жатқан теңгені көлігіне тыққыштап, өзімен-өзі болып кетті.
Міне, ол тағы бір көлікке «тоқта!» деп белгі берді. Құйғытып келе жатқан көлік жол сақшысын қағып кете жаздап барып, зорға тоқтады.
– Әй, сен өзі, былай, ішіп алғаннан саумысың? Қане, құжаттарынды көрсет! – деп ақырды ол кабинадан созбалаңдап түскенге.
– Сен мені танымадың ба? Мен әкімдікте істейтін жауапты маман боламын. Ал сен мені негізсіз тоқтатасың. Бұ қалай? – деді тәлтіректеп тұрған жүргізуші.
– Көке! Әкімдікте істемек түгілі, одан да жоғары жерде істесеңіз де сізді жазалауға тура келеді. Өйткені рульге ішіп алып отыруға болмайды.
– Ненің болатынын, ненің болмайтынын мен саған көрсетейін.
Мас жүргізуші жол сақшысын ұрып жіберердей түйіліп келіп, жалт бұрылды. Жол сақшысы телефонымен әлдекімге хабарласып жатты.
– Жолдас бастық. Бір масты тоқтаттым. Өзі әкімдікте жұмыс істеймін дейді. Не істеу керек?
– Қарай гөр өзін? Дереу көлігін айып тұрағына жеткіз. Өзін бөлімге әкеліп тапсыр.
– Құп! Орындаймыз, басеке!
Жол сақшысы ішімдік ішіп көлік руліне отырған әкімдіктің әйдік қызметкерін тиісті орынға тапсырып, белгіленген жерге қайтып оралды. Міне, тағы бір тентекпен жағаласып тұр.
– Әй, мені білмейсің бе? Осыдан қара да тұр, көзіңе көк шыбын үймелетпесем, Біржан атым құрып кетсін! Мен қалалық прокуратурада жұмыс істейтін Біржан деген дөй қызметкермін. Сендейлердің талайын көргенмін, – деп дүрсе қоя берді көлік иесі.
Жол сақшысы тағы да бастығына жүгінді.
– Жолдас бастық! Мұнда біреу прокуратураданмын деп өкіреңдеп тұр. Не істейін?
– Прокуратурада істемек түгілі, одан жоғарысында болса да, аяма. Жазасын бер! Тәртіп керек, тәртіп!
– Құп, болады, жазалаймыз.
Тағы бір сағат өткенде жол сақшысы және бір күдікті көлікті тоқтатты.
– Жын қуғандай неге безектеп келесіз?
– Асығыс шаруам бар еді.
– Бүгінде кімнің асығыс шаруасы жоқ дейсің? Жол жүру ережесін бұздыңыз. Айыппұл төлейсіз.
– Мен Тәшім Тайлақ деген қалалық соттың судьясы боламын. Сенбесең, бастығыңнан сұра.
– Жолдас бастық! Мұнда Тәшім Тайлақ деген судья тұр. Сізді жақсы танимын дейді. Өзі рұқсат етілмеген жерде көлік жылдамдығын шамадан тыс асырды. Өзі ұрттап алаған ба, аузынан арам қатқан иттің иісі шығады.
– Аяма! Жазала! Он бес тәулікке қамат.
– Құп болады, жолдас бастық!
Жол сақшысы тағы бір тентіреп жүргенді тосып алды. Қолында микрофоны бар бұл неме де удай мас еді. Көлігінен түскеннен жол сақшысын балағаттап, айтпаған сөзі қалмады.
– Ішіп алып көлік тізгіндегенсіз. Оның үстіне мемлекеттік қызметкерді балағаттап тұрсыз. Сізге шара көреміз, – деді жол сақшысы.
– Өлә! Маған шара көретін сен кім едің өзі? Білсең, Баха деген блогер мен боламын. Өзіңді бастығыңмен қосып қызметтеріңнен қууға шамам келеді. Тұр былай жолымнан. Тұмар сияқты аяққа оратылған осылардан-ақ көресіні көріп біттік қой.
Блогер тас-талқан болып ашуланды. Жол сақшысы тағы да бастығына қоңырау шалды.
– Жолдас бастық! Мұнда біреу Баха деген блогер мен боламын деп бізді қырып-жойып барады. Не істеуім керек?
– Ойбай! Блогер болса, жолама, жібере сал, Ертең қыр соңымызға түсіп алып, бәле болар.
Блогер Баха жалғанды жалпағынан басып кетіп бара жатты. Жол сақшысы күннің астында быжып қала берді.
Сабырбек ОЛЖАБАЙ