Атырау қаласында орналасқан Қазақстан Республикасы Ұлттық ұланының 5546 әскери бөлімінде дәстүрлі «Мектепке жол» республикалық қайырымдылық акциясы аясында игі шара ұйымдастырылды, – деп хабарлайды Aikyn.kz.
Акцияның басты мақсаты – көпбалалы әскери қызметшілердің отбасыларына қолдау көрсетіп, балалардың жаңа оқу жылына қажетті құрал-жабдықтармен қамтылуына ықпал ету.
Шара Halyk Bank АҚ-ның демеушілігімен өткізіліп, әскери қызметшілердің мектеп жасындағы балаларына оқу жылына қажетті мектеп құралдары табысталды. Атап айтқанда, балаларға мектеп сөмкелері, дәптерлер, қаламсаптар және басқа да оқу құралдары берілді.
– Балаларға жасалған әрбір қолдау – олардың білімге деген ынтасын арттырып, болашаққа нық қадам басуына берілген мүмкіндік. Осындай игі бастамалар әскери қызметшілердің отбасыларына көрсетілетін әлеуметтік қолдаудың маңызды бөлігі, – деді әскери бөлім командирі, полковник Самет Құлахмедов.
«Мектепке жол» акциясы – қоғамдағы қайырымдылық пен өзара қолдаудың маңызын арттыратын игі дәстүр. Ұлттық ұланның әскери бөлімдері де жыл сайын бұл бастамаға белсенді түрде атсалысып келеді.