Алматыдағы Перинаталдық орталықта тамыз айында екі отбасы үшем сүйді, – деп хабарлайды Aikyn.kz сайты.
Алғашқы үшем 14 тамызда 27 жастағы Мөлдір Советханованың отбасында дүниеге келді. Екі ұл мен бір қызға Айхан, Айбын және Айза есімдері берілген. Нәрестелердің салмағы 1 800, 1 480 және 1 400 грамм болды.
Сәбилер бастапқыда реанимация және қарқынды терапия бөлімінде ем алып, жағдайы тұрақтанғаннан кейін жоғары тәуелділіктегі нәрестелер бөліміне ауыстырылды.
Ал 31 тамызда Рахат Бигелдиеваның отбасында тағы бір үшем дүниеге келді. Жүктіліктің 32-аптасында туған екі қыз бен бір ұлға Ахмет, Халима және Амина есімдері қойылған. Олардың салмағы 1 998, 1 412 және 1 347 грамм.
Қазір үш сәби де дәрігерлердің бақылауында. Оларға тыныс алуды қолдау және қажетті медициналық көмек көрсетіліп жатыр.
Дәрігерлер нәрестелердің жағдайын тұрақтандырып, қажетті салмақ жинауына жағдай жасап отыр.