Көпқабатты үйде түнде қатты музыка қосу, жөндеу жұмыстарын жүргізу немесе өзге де жолмен көршілердің тыныштығын бұзу әкімшілік жауапкершілікке әкелуі мүмкін, – деп хабарлайды Aikyn.kz сайты.
Әкімшілік құқық бұзушылық туралы кодекстің 437-бабына сәйкес, жеке тұлғалардың қалыпты демалысы мен тыныштығына кедергі келтіретін шуға сағат 22:00-ден таңғы 09:00-ге дейін жол берілмейді.
Талапты бұзған жеке тұлғаға 5 АЕК мөлшерінде айыппұл салынады. 2026 жылы 1 АЕК 4 325 теңге болғандықтан, айыппұл көлемі 21 625 теңгені құрайды. Егер адам бір жыл ішінде тыныштықты қайта бұзса, айыппұл 10 АЕК-ке, яғни 43 250 теңгеге дейін өседі.
Тұрғын үйлерде және тұрғын үй аумақтарында орналасқан ойын-сауық орындарына қатысты уақыт тәртібі өзгеше: жұмыс күндері 22:00-ден 09:00-ге дейін, ал демалыс және мереке күндері 23:00-ден 10:00-ге дейін тыныштық сақталуы керек.
Көршілер белгіленген уақытта тыныштықты бұзса, тұрғындар полицияға 102 нөмірі арқылы хабарласа алады.