Мемлекет бұл бағытқа кейінгі бірнеше жылда өте қатты мән берді. Соның арқасында мыңдаған балабақша мен мектеп бой көтеріп, болашақ ұрпаққа қолайлы жағдай жасалды.
Нақты сандарға көз салар болсақ, Қазақстанда кейінгі 7 жылда 1 400-ден астам балабақша, 1 300-ден астам мектеп ашылған. Қазір елдегі 8 мыңнан астам білім ошағы барын ескерсек, 500 балаға 1 мектептен келеді. Бұл көрсеткіш алдағы уақытта да жақсара беретіні даусыз. Осылайша, білім беру саласында үш ауысымды, екі ауысымды мектептер азая бастады.
Кейінгі жылдары білім саласына бөлінген қаржы да ұлғайғанын байқау қиын емес. Мысалы, 7 жыл ішінде білім беру саласына 6,4 триллион теңге бөлінді. Бұл қаржының дені мектеп құрылысына, білім беру базасына және педагогикалық құрамды қамтамасыз етуге бағытталған. Оқу-ағарту министрлігінің мәліметінше, кейін 5 жылда 5 мыңнан астам ауыл мектебінің материалдық-техникалық қоры жаңартылды, білім ошақтарында 7 мыңнан астам заманауи үлгідегі кабинеттер жасақталды.
«Жайлы мектеп» жобасы да салаға тың серпін берді. Әсіресе ауыл балалары қаладағы қатарластарымен тең білім алатын дәрежеге жетті. Қазірге дейін салынған 217 «жайлы мектептің» 84-і ауылдық жерлерде орналасқан. Бұл мектептерде STEM-зертханалар, робототехника кабинеттері, коворкингтер, хореография және спортзалдар бар. Бастауыш және жоғары сынып оқушылары бөлек блоктарда білім алады, ерекше білім беру қажеттіліктері бар балалар үшін кедергісіз орта қалыптасты.