«Бернли» клубының бас бапкері Ники Хайен «Уотфордқа» қарсы матчтан кейін қазақстандық шабуылшы Дастан Сәтпаевтың өнеріне тоқталды.
Бапкердің айтуынша, Сәтпаев бірнеше матчты өткізіп алғандықтан, оның алаңдағы жүктемесін біртіндеп арттыру қажет.
«Біз бапкерлер құрамымен ақылдасып, бүгін оған 20 минут ойнауға мүмкіндік бердік. Дастан жаттығуларда өзін өте жақсы көрсетті. Бүгін алаңға шыққаннан кейін қарсыласқа қауіп төндіре алатынын байқадық», – деді Хайен.
Бапкер 13 қазанда «Чарльтонға» қарсы өтетін кездесуге Сәтпаевтың қатысуы әзірге белгісіз екенін айтты. Шешім футболшының дайындығы мен жарақатының қайталану қаупін ескере отырып қабылданады.
Айта кетейік, «Бернли» «Уотфордты» 4:0 есебімен жеңіп, Чемпионшиптегі алғашқы жеңісіне қол жеткізді.