Қазақстанда құрылыс нысандарының мүгедектігі бар адамдар үшін қолжетімділігіне қатысты 138 декларацияны келісуден бас тартылған, – деп хабарлайды Aikyn.kz сайты.
Ведомство мәліметінше, биыл 1 маусымнан бастап елімізде жаңа Құрылыс кодексіне сәйкес ғимараттардың мүгедектігі бар және жүріп-тұруы шектеулі азаматтар үшін қолжетімділігін бағалаудың жаңа тәртібі енгізілген.
2026 жылғы 30 қыркүйектегі жағдай бойынша министрліктің аумақтық департаменттеріне 562 өтініш түскен. Оның 147-сі мақұлданған, 138-і бойынша келісуден бас тарту туралы шешім қабылданған. Тағы 165 өтініш қаралып жатыр. Бас тарту жағдайлары ең көп тіркелген өңір – Алматы қаласы. Мұнда 41 өтініш мақұлданбаған. Қостанай облысында 18, Шымкентте 14 өтініш бойынша осындай шешім шығарылған.
Жаңа тәртіптің басты мақсаты – ғимараттарды пайдалануға бергенге дейін олардың барлық азамат үшін қолжетімді болуын қамтамасыз ету. Атап айтқанда, құрылыс нысандарының мүмкіндігі шектеулі адамдардың еркін жүріп-тұруына қаншалықты бейімделгені ескеріледі.
Министрлік ғимараттардың қолжетімділігі құрылыс аяқталғаннан кейін емес, жобалау кезеңінен бастап қарастырылуы тиіс екенін атап өтті.