Ұлттық мереке қарсаңында Мемлекет басшысының Жарлығымен Құрылтай депутаты Айжан Сқақова және Құрылтай Аппаратының бөлім меңгерушісі Азалия Мейірманова «Ерен еңбегі үшін» медальдарымен марапатталды.
Әріптестерін құттықтаған Құрылтай Төрағасы мемлекеттік наградалар олардың кәсіби қызметіне және еліміздің дамуына қосқан елеулі үлесіне берілген жоғары баға екенін атап өтті. Спикер Республика күнінің Қазақстан үшін айрықша маңызына тоқталып, Мемлекеттік егемендік туралы декларацияның қабылдануы еліміздің Тәуелсіздігіне тарихи жол ашқанын айтты.
– Мемлекет басшысы Қасым-Жомарт Тоқаевтың бастамасымен осы айтулы күннің ұлттық мәртебесі қайтарылды. Бұл шешім тарихи жадымызды жаңғырту мен ұлттық сананы нығайтудағы маңызды қадам болды. Бүгінгі таңда Республика күні қазақстандықтарды Тәуелсіздік, бірлік және ел болашағы жолындағы жауапкершілік сынды ортақ құндылықтар төңірегінде біріктіреді. Осы құндылықтарды сақтау және мемлекеттілігімізді одан әрі нығайту – баршамыздың ортақ міндетіміз, – деді Айбек Дәдебай.
Құрылтай Төрағасы депутаттық корпус пен Аппарат қызметкерлерін Ұлттық мерекемен құттықтап, заң шығару жұмысында, Қуатты әрі Әділетті Қазақстанды құруға бағытталған, ел игілігін көздеген жауапты қызметте табыс тіледі.