Жолдауда геология, су және басқа салаларға қатысты ұзақмерзімді міндеттер қамтылған. Алайда бірқатар тапсырманың орындалуы кешеуілдеп келеді. Президенттің инвестиция мәселесімен айналысатын бір ғана ұйымды қалдыру туралы ұсынысы маңызды. Шетелдік сапарларда миллиардтаған қаржыға келісімдер жасалғанымен, инвесторларға жер уақтылы берілмей, жұмыс жүргізуге жағдай жасалмайды.
Мектеп құрылысы қарқынды жүргенімен, мерзімінде аяқталмаған нысандар бар. Салынуға тиіс 50 шекара бекетінің 20-сы ғана аяқталып, қалған 30-ы бойынша мәселе шешілмеген. Мерзімнің созылуы құрылыс құнын өсіріп отыр. Дегенмен кешенді жұмыс пен экономиканың дамуы жоспарлардың жүзеге асып жатқанын көрсетеді.
Ауқатты азаматтарға салынатын салықты әділеттілік, қоғамның көңіл күйі және байлыққа көзқарас тұрғысынан қарастырған жөн. Байлықты жағымсыз құбылыс деп қабылдамауымыз керек. Тарихта дәулетті азаматтар халыққа қиын кезеңдерден өтуге көмектескен. Бүгінде де олар салық төлейді. Сондықтан капитал мен инвестицияның елден кетпеуін қамтамасыз етіп, әділет қағидатын орнықтыру қажет.
Салық заңнамасындағы өзгерістерді әзірлеу үшін Үкімет депутаттармен жұмыс тобын құрып, кәсіпкерлік қауымдастықтармен және «Атамекен» палатасымен нақты ұсыныстарды талқылауы керек.
Байлықтың да әділетті өлшемі бар. Металл мен мұнай бағасының өзгеруіне байланысты компанияларға салынатын салықты талқылау арқылы шешуге болады. Бұл бюджетке қосымша қаражат түсіреді. Ауқатты азаматтардың әлеуметтік көмектің 14 түрінен өз еркімен бас тартуы да әділет қағидатына сәйкес келеді.
Ең төменгі жалақыны көтеру мәселесі пісіп-жетілді. Депутаттар оны бірнеше рет көтерді. Бұл шешім миллиондаған адамның тұрмысына оң әсер етіп, экономикаға серпін береді. Жалақыны арттыруда баға деңгейі мен экономиканың өсуі ескерілген. Оның көтерілуі өзге жалақылардың өсуіне де ықпал етеді. Кәсіпорындардың бұған мүмкіндігі бар деп есептеймін.
Бизнеске қатысты үш жылдық мораторий де маңызды. Цифрлық технологиялар мен камералдық бақылау көптеген мәселені кәсіпкерге бармай, өзін мемлекеттік органға шақырмай шешуге мүмкіндік береді. Ақша қозғалысы мен қаражаттың жұмсалу бағыттары ақпараттық жүйелерде қамтылған. Мұндай жағдайда кәсіпкерді қайта-қайта шақырып, есебін түзетуді немесе қағаз құжат ұсынуды талап ету орынсыз. Бизнесті артық әуреге салудың қажеті жоқ.