Жаңа тәртіп 14 қыркүйектен бастап қолданысқа енгізілді, – деп хабарлайды Aikyn.kz сайты.
Өнеркәсіп және құрылыс министрлігінің мәліметінше, енді ауылдық елді мекендерде тұрғын үй кезегінде тұрған азаматтар өздеріне ұсынылған жалдамалы пәтерлердің арасынан таңдау жасай алады. Бұған дейін баспана бөлу кезінде мұндай мүмкіндік қарастырылмаған.
Жаңа тәртіп бойынша азаматтар тиісті ауданның ауылдарында бос жалдамалы тұрғын үй пайда болған сайын оны таңдап, алуға өтініш бере алады. Бұл тұрғындардың өзіне қолайлы елді мекеннен баспана алуына мүмкіндік береді.
Сонымен қатар мемлекеттік тұрғын үй бөлу кезінде отбасы құрамы ескеріледі. Атап айтқанда, бөлмелер санын анықтағанда ерлі-зайыптыларға, ата-аналарға және әртүрлі жыныстағы балаларға жеке бөлме қарастыру талаптары назарға алынады.
Министрлік мемлекеттік тұрғын үйдің кемінде 20 пайызы жетім балалар мен ата-анасының қамқорлығынсыз қалған балаларға бөлінетінін мәлімдеді. Ал кемінде 50 пайызы әлеуметтік осал топтарға жататын азаматтардың жекелеген санаттарына қарастырылған.
Жаңа ереже ауыл тұрғындарының баспана таңдау мүмкіндігін кеңейтуге және тұрғын үй бөлу кезінде отбасылардың нақты қажеттіліктерін ескеруге бағытталған.