Абай ауданы әкімдігінің аппараты мен Шымкент қаласы әкімдігі жанындағы Әйелдер істері және отбасылық-демографиялық саясат жөніндегі комиссияның ұйымдастыруымен «Күзгі шабыт – жаңа мүмкіндіктер» атты кездесу өтіп, онда әйелдердің қоғамдағы рөлі, кәсіпкерлік белсенділігі және отбасылық құндылықтарды дәріптеу мәселелері кеңінен талқыланды.
Қазір елімізде отбасы институтын нығайту, әйелдердің экономикалық дербестігін арттыру және гендерлік теңдікті қамтамасыз ету Мемлекет басшысы Қасым-Жомарт Тоқаевтың тапсырмаларына сәйкес мемлекеттік саясаттың стратегиялық бағыттарының бірі ретінде айқындалған. Осы тұрғыда Шымкентте өткен бұл шара орталық пен жергілікті атқарушы органдардың бірлескен жұмысының жарқын көрінісі болды. Кәсіпкерлік – әйелдердің өз қабілетін танытуына мүмкіндік беретін сала. Іс-шараның негізгі мақсаты да өз кәсібін енді бастағысы келетін немесе бар кәсібін кеңейтуді көздейтін әйелдерге мемлекеттік қолдау тетіктерін түсіндіру, оларды кәсіпкерлікке тарту және құқықтық-психологиялық қолдау көрсету болды.
Жиын барысында Абай ауданы әкімдігі аппаратының әлеуметтік қолдау бөлімінің басшысы Меруерт Тұтқышбаева сөз алып, іс-шараның мән-маңызына тоқталды.
– Бұл кездесудің басты мұраты әйелдің қоғамдағы орнын айшықтау, оның тек отбасының ұйытқысы ғана емес, сонымен қатар экономиканың белсенді субъектісі екенін көрсету. Біз әйелдер кәсіпкерлігін қолдау арқылы отбасының әл-ауқатын, балалардың болашағын, тұтас қоғамның тұрақтылығын қамтамасыз етеміз. Бүгін алаңда кеңес беру бұрыштары жұмыс істеп, мемлекеттік гранттар, жеңілдетілген несиелер, кәсіптік оқыту курстары жөнінде толық ақпарат берілді, – деді ол.
Мұндағы саябақ аумағында тігілген ақпараттық шатырларда «Даму» кәсіпкерлікті дамыту қорының, «Атамекен» ұлттық кәсіпкерлер палатасының, Жұмыспен қамту орталығының мамандары жеке-жеке кеңес берді. Әйелдер «Еңбек», «Бастау Бизнес», «Әйелдер кәсіпкерлігін дамыту» сынды бағдарламалар арқылы 400 АЕК-ке дейінгі қайтарымсыз грантты қалай алуға болатынын, төмен пайызбен несие рәсімдеудің жолдарын білді. Шараның сәнін келтірген тағы бір бөлім жергілікті қолөнерші және кәсіпкер әйелдердің жәрмеңкесі болды. Мемлекеттік қолдаумен өз ісін дөңгелетіп отырған 30-ға жуық әйел өз өнімдерін ұлттық нақыштағы киімдер, қолдан жасалған тәттілер, тоқыма бұйымдары мен табиғи косметиканы көпшілік назарына ұсынды. Бұл мемлекеттік көмектің нақты нәтижесінің дәлелі. Отбасы – қоғамның алтын қазығы.
Іс-шара тек экономикалық қолдаумен шектелген жоқ. Гендерлік саясаттың ажырамас бөлігі – отбасылық құндылықтарды сақтау. Осы мақсатта алаңда Отбасын қолдау орталықтарының, қалалық емханалардың білікті психологтары мен заңгерлері құпия және тегін қабылдау жүргізді. Кез келген әйел тұрмыстық зорлық-зомбылықтың алдын алу, отбасылық қарым-қатынасты нығайту, бала тәрбиесі, репродуктивті денсаулық мәселелері бойынша кәсіби кеңес ала алды. Бұл қиын жағдайға тап болған әйелдер үшін ашық есік, сенімді тірек болғаны сөзсіз. Жиынға Әйелдер істері және отбасылық-демографиялық саясат жөніндегі комиссия мүшелері, мәслихат депутаттары, мемлекеттік органдардың өкілдері, кәсіпкер әйелдер және қала тұрғындары мен қонақтары қатысты. Күзгі жапырақтармен көмкерілген фотозона қатысушыларға көтеріңкі көңіл күй сыйлап, отбасымен бірге түскен естелік суреттерге толы болды.
Ұйымдастырушылардың айтуынша, «Күзгі шабыт – жаңа мүмкіндіктер» форматындағы кездесулер алдағы уақытта Абай ауданына қарасты барлық елді мекенде, яғни Қатын көпір, Қызылжар, Алтынтөбе, Жайлау шағынаудандарында тұрақты түрде жалғасады. Мұндай игі бастамалар әйелдің қоғамдағы мәртебесін көтеріп қана қоймай, берік отбасы қуатты мемлекет қағидатын іс жүзінде жүзеге асыруға жол ашады. Өйткені кәсібі бар, құқығы қорғалған, қолдау көрген әйел – тәрбиелі ұрпақ, тату отбасы, тұрақты қоғам кепілі.
Назгүл НАЗАРБЕК,
Шымкент қаласы