Ал Сыр өңірі – еліміздің солтүстігі мен оңтүстігін, батысы мен шығысын байланыстыратын маңызды көлік инфрақұрылымы жасақталған аймақтардың бірі. Осы мүмкіндікті тиімді пайдалану, теміржол инфрақұрылымын жаңғырту және тасымал тиімділігін арттыру – экономикалық өсімнің маңызды алғышарты. Осы мәселелер «Әділет» партиясының Қызылорда қалалық филиалы ақпараттық-түсіндіру тобының өкілдерінің кезекті кездесуінде талқыланды.
Партияның ақпараттық-түсіндіру тобының өкілдері Руслан Рүстемұлы, Әлібек Жаппасбаев, Асхат Шәукенбаев «Қазақстан темір жолы» ҰК» АҚ «Қызылорда магистральдық желі бөлімшесінде» өткен кездесуде Мемлекет басшысының Қазақстан халқына арнаған Жолдауында айқындалған көлік-логистика саласын дамытудың негізгі бағыттарын түсіндірді.
Бүгінде өңірден өтетін магистралды теміржол желісінің ұзындығы 1051,7 шақырымды құрайды. Облыс аумағы арқылы жолаушылар пойыздары тұрақты қатынап, Қызылорда қаласынан Астана, Петропавл, Павлодар, Көкшетау, Семей және Түркістан бағыттарына жүретін мүмкіндігі бар. Теміржол желісі аудан орталықтары мен елді мекендердің көлік қатынасын қамтамасыз етуде де маңызды қызмет атқарады. Сонымен қатар Сыр өңірінің теміржол әлеуеті жолаушылар тасымалымен ғана шектелмейді. Аймақта өндірілетін күріш, тұз, мұнай өнімдері, құрылыс материалдары мен өзге де тауарларды еліміздің басқа өңірлеріне және сыртқы нарықтарға жеткізуде теміржолдың орны ерекше. Жүк тасымалының қолжетімді әрі тиімді болуы жергілікті кәсіпорындардың өндіріс көлемін ұлғайтуына, логистикалық шығындарды азайтуына және жаңа нарықтарға шығуына мүмкіндік береді. Сондықтан теміржол инфрақұрылымын дамыту – өңірге инвестиция тартудың, жаңа өндіріс орындарын ашудың және кәсіпкерлік белсенділікті арттырудың да маңызды тетігі.
Ал ақпараттық топ өкілі Әлібек Жаппасбаев көлік саласын дамытумен қатар, адами капиталды нығайту, еңбек өнімділігін арттыру және заманауи технологияларды енгізу мәселелеріне назар аударды. Ол теміржол саласының тұрақты жұмыс істеуі білікті мамандарға, олардың кәсіби дайындығына және еңбек қауіпсіздігінің сақталуына тікелей байланысты екенін атап өтті. Сонымен бірге цифрлық шешімдерді енгізу, тасымал процестерін автоматтандыру, жүк қозғалысын бақылау жүйелерін жетілдіру қызмет көрсету сапасын арттырып, уақыт пен ресурсты тиімді пайдалануға жол ашатынын жеткізді.
Кездесуде Мемлекет басшысының Жолдауында көтерілген инфрақұрылымдық жобалар да сөз болды. Соңғы бес жылда елімізде 911 шақырым жаңа теміржол салынса, қазір тағы 800 шақырым теміржол құрылысы жүргізіліп, қолданыстағы 2,6 мың шақырым желіні жаңғырту жұмыстары қолға алынған. Сондай-ақ «Бақты – Аягөз» теміржол желісінің құрылысы Қазақстанның Қытаймен көлік қатынасын кеңейтіп, транзиттік жүк тасымалының мүмкіндігін арттыруға бағытталған.
Жиын барысында теміржол саласының өзекті мәселелері де назардан тыс қалмады. Сала мамандары инфрақұрылымның жай-күйі, тасымал сапасы, еңбек жағдайы мен алдағы даму бағыттарына қатысты ұсыныс-пікірлерін ортаға салды. Қатысушылар саладағы мәселелерді жүйелі шешу, өндірістік әлеуетті арттыру және мамандардың кәсіби мүмкіндіктерін қолдау қажеттігін атап өтті.
Бекбол АМАНГЕЛДІ