Мемлекет басшысы Қасым-Жомарт Тоқаев еліміздегі түбегейлі жаңғыру бағдарына, жалпыұлттық референдум арқылы қабылданған жаңа Конституцияның тарихи маңызына және алда тұрған стратегиялық міндеттерге кеңінен тоқталды, – деп хабарлайды Aikyn.kz Ақордаға сілтеме жасап.
Президент баршаға бірдей мүмкіндік беретін, адал еңбек пен айрықша жауапкершілікті жоғары бағалайтын Әділетті Қазақстанды құру ісіне кіріскенімізді атап өтті. Сонымен қатар «Таза Қазақстан» жалпыұлттық қозғалысының арқасында азаматтардың бойында жаңа этика мен мүлде жаңа сипаттағы бітім-болмыс қалыптаса бастағанын жеткізді.
Мемлекет басшысы:
«Енді алдымызда тұрған мақсат – шын мәнінде айбынды.
Біз баршаға бірдей мүмкіндік беретін, адал еңбек пен айрықша жауапкершілік қасиеттерін жоғары бағалайтын Әділетті Қазақстанды құруға кірістік.
«Таза Қазақстан» жалпыұлттық қозғалысын қолға алдық, соның арқасында азаматтарымыздың бойында жаңа этика мен мүлде жаңа сипаттағы бітім-болмыс қалыптаса бастады.
Біз жасампаз әрі жаңашыл ұлт ретінде түбегейлі жаңғыру жолына бет бұрдық.
Реформаларымыздың ең басты бөлігі, бұл – Конституцияның қабылдануы. Азаматтарымыз жалпыұлттық референдумға белсенді қатысып, өз таңдауын жасады.
Қазақстанның жаңа Конституциясы заңды күшіне енді. Конституцияда еліміздің мақсат-мұраты мен болашақтағы бейнесі айқын көрініс тапты.
Қазақстанның Егемендігі мен Тәуелсіздігі, жеріміздің тұтастығы, азаматтарымыздың заңды құқықтары мен бостандықтары мемлекеттің қастерлі құндылығы деп танылды.
Қоғамда Заң мен Тәртіпті орнықтыру, жалпыұлттық бірлікті бекемдеу, халықтың әл-ауқатын арттыру бұлжымас қағидат ретінде бекітілді.
Адам капиталын, білім мен ғылымды, инновацияны дамыту стратегиялық міндет деп белгіленді», - деді.